Moʻgʻuliston poytaxti yaqinida ayiq uyga hujum qilib, bir kishini oʻldirdi

Moʻgʻuliston poytaxti yaqinida ayiq uyga hujum qilib, bir kishini oʻldirdi

Moʻgʻuliston poytaxti Ulan-Bator yaqinida ayiq oʻz uyida boʻlgan er-xotinga hujum qilishi oqibatida bir erkak halok boʻldi, bir ayol esa ogʻir jarohat oldi.

Politsiyaning maʼlum qilishicha, voqea chorshanbaga oʻtar kechasi Bayanzurx tumanida, ularning oʻtov (ger) deb ataladigan anʼanaviy moʻgʻul koʻchmanchi uyi ichida sodir boʻlgan.

40 yoshlardagi erkak halok boʻlgan, 50 yoshlardagi ayol esa qochishga muvaffaq boʻlib, qoʻshnilarni ogohlantirgan. Shahar rasmiysi Munxbayar M. jurnalistlarga ayolning shifoxonada ogʻir ahvolda yotganini maʼlum qildi.

Iqlim oʻzgarishi va oziq-ovqat tanqisligi kabi omillar tufayli Moʻgʻulistonda odamlar yashaydigan joylar yaqinida ayiqlar paydo boʻlishi tez-tez kuzatilmoqda.

Oʻrmonchilar guruhi ayiqni qidirmoqda, rasmiylar esa mahalliy aholini hushyor boʻlishga va har qanday shubhali holat haqida xabar berishga chaqirdi.

AFP axborot agentligi xabariga koʻra, Munxbayar joriy yilning oʻzida poytaxt yaqinida 24 marta ayiq koʻrilganini, 2018 yilda esa bunday holat bor-yoʻgʻi ikki marta qayd etilganini aytgan.

Soʻnggi haftalarda Moʻgʻuliston ijtimoiy tarmoqlarida ayiqlarning oʻtovlarga kirib borayotgani yoki ularga shikast yetkazayotgani, shuningdek, chorva mollariga hujum qilayotgani aks etgan videolar keng tarqaldi, bu esa butun mamlakat boʻylab ayiqlar va odamlar oʻrtasidagi toʻqnashuvlar koʻpayganini koʻrsatmoqda.

AFP xabariga koʻra, sakkizta viloyatda ayiq ovlash uchun ruxsatnomalar berilgan va rasmiylar qishloq joylardagi oʻrmonchilarga yordam berish uchun trankvilizatorli (tinchlantiruvchi) oʻq otadigan qurollarni yetkazib berishga harakat qilmoqda.

Koʻpgina moʻgʻullar koʻchmanchi hayot tarzini olib boradi, biroq oʻtroq dehqonchilik jamoalari ham tobora keng tarqalmoqda. Hozirda aholining tobora koʻproq qismi poytaxt yoki boshqa yirik shahar markazlarida istiqomat qilmoqda.