Mitch Makkonnell uch oylik tanaffusdan keyin Senatga qaytdi
Iyun oyidan beri qatnashmayotgan respublikachi senator oʻz sogʻligʻi bilan bogʻliq shaffoflik masalasida savollarga duch keldi.
Mitch Makkonnell uch oylik tanaffusdan keyin Senatga qaytdi
AQSh senatori Mitch Makkonnell uch oy avval yiqilib tushib, shifoxonaga yotqizilganidan beri ilk bor Kongressga qaytdi.
«Men Senat zaliga qaytishni va hamkasblarimni koʻrishni juda intizorlik bilan kutgandim», dedi Kentukki shtatidan boʻlgan 84 yoshli respublikachi sud tizimiga nomzod boʻyicha ovoz berishdan oldin.
Makkonnellning uzoq vaqt davomida yoʻqligi uning sogʻligʻi haqida keng tarqalgan mish-mishlarga, shuningdek, demokratlar tomonidan koʻproq shaffoflik taʼminlanishi haqidagi talablarga sabab boʻldi.
Senat tarixidagi eng uzoq muddat xizmat qilgan partiya yetakchisi Senatda 41 yil faoliyat yuritgan.
«Sogʻayish jarayonim uzoq va koʻpincha asabiylashtiradigan kechdi, bolalikdagi poliomiyelitning asoratlari esa buni yanada qiyinlashtirdi», dedi Makkonnell dushanba kuni.
«Men hali ham 100 foiz oʻzimga kelganim yoʻq», deya qoʻshimcha qildi u va «qiyin ovoz berish jarayonlarida ishtirok etish uchun qoʻlimdan kelganini qilaman» dedi.
«Shu oyda ularning [Kentukkilik hamyurtlarim] nomidan odatiy ish faoliyatimga qaytishdan xursandman», deya yakunlanadi uning bayonoti.
Senatorning AQSh poytaxtidagi uyini tark etayotgani tasvirlangan videoda uning nogironlar aravachasiga oʻtqizilib, mashinaga olib borilgani aks etgan.
Oradan koʻp oʻtmay u Senat zalida koʻrinish berdi va u yerda bir nechta senatorlar uni kutib olishdi.
Makkonnell oxirgi marta 11 iyun kuni ovoz bergan edi. Uning qayerda ekanligi haqidagi savollar koʻpaygach, uning idorasi bir oydan keyin bayonot berib, u 14 iyun kuni uyida yiqilib tushgani va shifoxonada yengil zotniljam (pnevmoniya) kasalligidan davolanganini maʼlum qildi.
Senat faxriysining sogʻligʻi bilan bogʻliq xavotirlar soʻnggi yillarda tez-tez paydo boʻlmoqda.
U 2024 yilda yiqilib tushib, yengil jarohat olgan edi. Bir yil oldin esa u yana bir bor yiqilib, miya chayqalishi bilan shifoxonaga yotqizilgandi.
Shuningdek, 2023 yilda Makkonnell jurnalistlar bilan gaplashayotib, bir nuqtaga tikilib qolgan va bu uning aqliy qobiliyati haqida savollar tugʻdirgan edi.
Uning dushanba kungi qaytishi Senat besh haftalik tanaffusdan keyin qayta ish boshlagan birinchi kunga toʻgʻri keldi.
Senatorlar endi noyabr oyida boʻlib oʻtadigan va Kongressdagi kuchlar muvozanatini oʻzgartirishi mumkin boʻlgan oraliq saylovlar oldidan qonunchilik ishlarining yakuniy bosqichiga kirishmoqda.
Vakolat muddati yanvar oyida tugaydigan Makkonnell qayta saylanish uchun oʻz nomzodini qoʻymayapti.