Mirziyoyev va Vuchich munosabatlarning yangi bosqichini muhokama qildilar

Mirziyoyev va Vuchich munosabatlarning yangi bosqichini muhokama qildilar

Oʻzbekiston Prezidenti Shavkat Mirziyoyev va Serbiya Prezidenti Aleksandr Vuchich Belgradda «tet-a-tet» formatida hamda rasmiy delegatsiyalar ishtirokida muzokaralar oʻtkazdilar.

Tomonlar ikki mamlakat oʻrtasidagi siyosiy, savdo-iqtisodiy, investitsiyaviy va gumanitar hamkorlikni yanada rivojlantirish masalalarini koʻrib chiqdilar.

Uchrashuv avvalida Mirziyoyev Serbiya yetakchisiga samimiy qabul va mehmondoʻstlik uchun minnatdorlik bildirdi. U Oʻzbekiston Prezidentining Belgradga ilk tashrifi ikki davlat oʻrtasidagi munosabatlarda yangi bosqichning boshlanishi boʻlishini taʼkidladi.

Muzokara ishtirokchilari siyosiy muloqot, parlamentlararo aloqalar, savdo-iqtisodiy hamkorlik, shuningdek, ishbilarmonlik va gumanitar almashinuvlar faollashganini qayd etdilar. Diplomatik vakolatxonalarning ochilishi va parlamentlararo forumning tashkil etilishi munosabatlarni yanada chuqurlashtirish yoʻlidagi muhim qadam sifatida tilga olindi.

Prezidentlar savdo va investitsiyalarga alohida eʼtibor qaratdilar. Yil boshidan buyon yuqori darajali delegatsiyalar ishtirokida bir nechta iqtisodiy tadbirlar boʻlib oʻtdi. Muzokaralar arafasida Hukumatlararo komissiyaning birinchi yigʻilishi boʻlib oʻtdi, 8 sentyabr kuni esa ikki mamlakatning yetakchi kompaniyalari ishtirokida Oʻzbekiston-Serbiya biznes-forumi rejalashtirilgan.

Muzokaralar davomida tomonlar oʻzaro savdo hajmini oshirish, jumladan, xaridorgir tovarlar yetkazib berishni kengaytirish hisobiga koʻpaytirishni muhokama qildilar. Buning uchun erkin savdo toʻgʻrisidagi bitimni ishlab chiqish va qabul qilish, standartlashtirish sohasidagi hamkorlikni kuchaytirish hamda oʻzaro koʻrgazmalar tashkil etish taklif etilmoqda.

Oʻzbekiston, shuningdek, Belgraddagi «EKSPO-2027» xalqaro koʻrgazmasida faol ishtirok etish niyatida. Kelasi yili mamlakat ushbu tadbirda milliy pavilonini taqdim etadi.

Prezidentlar transport va logistika sohalarida, yengil va oziq-ovqat sanoatida, qishloq xoʻjaligi, farmatsevtika, tibbiyot va raqamli iqtisodiyotda yangi qoʻshma loyihalar istiqbollarini koʻrib chiqdilar. Avtokomponentlar, uskunalar, elektrotexnika va elektron mahsulotlar ishlab chiqarish boʻyicha sanoat kooperatsiyasida katta salohiyat mavjudligi qayd etildi.

Kelishuvlarni amalga oshirish uchun 2026–2028 yillarga moʻljallangan Sanoat sherikligini rivojlantirish boʻyicha qoʻshma Harakatlar rejasi qabul qilindi.

Yetakchilar hududlararo aloqalarni kengaytirish muhimligini ham taʼkidladilar. Ular Samarqand viloyati va Voyevodina, shuningdek, Samarqand va Novi-Sad shaharlari oʻrtasida toʻgʻridan-toʻgʻri aloqalar oʻrnatilganini olqishladilar.

Gumanitar sohada tomonlar taʼlim, madaniyat, sport va turizm sohalarida hamkorlikni rivojlantirishga kelishib oldilar. Xususan, Madaniyat kunlarini, qoʻshma kino, teatr va musiqa festivallarini oʻtkazish, shuningdek, sport federatsiyalari oʻrtasidagi toʻgʻridan-toʻgʻri aloqalarni kengaytirish rejalashtirilmoqda.

Muzokaralarning alohida mavzusi uyushgan mehnat migratsiyasi boʻldi. Serbiya ushbu sohadagi tizimli hamkorlikka yuqori qiziqish bildirdi. Tashrif yakunlari boʻyicha tomonlar mobillik va mehnat migratsiyasi toʻgʻrisidagi bitimning qabul qilinishini olqishladilar.

Mirziyoyev va Vuchich, shuningdek, mintaqaviy va xalqaro kun tartibi yuzasidan fikr almashdilar hamda koʻp tomonlama maydonlarda oʻzaro qoʻllab-quvvatlashni tasdiqladilar.

Erishilgan kelishuvlarni oʻz vaqtida bajarish, shuningdek, qabul qilingan qaror va bitimlarni amalga oshirish uchun keng qamrovli «yoʻl xaritasi» ishlab chiqiladi.