Mirziyoyev kasb bayrami arafasida Oʻzbekiston tibbiyot xodimlarini mukofotladi
Mirziyoyev kasb bayrami arafasida Oʻzbekiston tibbiyot xodimlarini mukofotladi
Prezident Shavkat Mirziyoyev Tibbiyot xodimlari kuni munosabati bilan sogʻliqni saqlash va farmatsevtika sohasi xodimlarini mukofotlash toʻgʻrisidagi farmonni imzoladi. Mutaxassislarga tibbiyotni rivojlantirish, zamonaviy texnologiyalarni joriy etish va kadrlar tayyorlashga qoʻshgan hissasi uchun faxriy unvonlar berildi, shuningdek, orden va medallar topshirildi.
Mukofotlanganlar orasida mamlakatning turli hududlaridan tibbiyot muassasalari rahbarlari, shifokorlar, hamshiralar, farmatsevtlar va boshqa mutaxassislar bor.
"Oʻzbekiston Respublikasida xizmat koʻrsatgan sogʻliqni saqlash xodimi" faxriy unvoniga Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazi direktori Botir Daminov, Onkologiya va tibbiy radiologiya markazi abdominal xirurgiya boʻlimi ilmiy rahbari Mirjalol Joʻrayev, Respublika ixtisoslashtirilgan xirurgik angionevrologiya markazi direktori Shavkat Karimov va Koʻz mikroxirurgiyasi markazi direktori Azamat Yusupov sazovor boʻldilar.
"Oʻzbekiston Respublikasida xizmat koʻrsatgan yoshlar murabbiysi" unvoni Toshkent davlat tibbiyot universiteti professori Adhamjon Vaisovga berildi.
"Fidokorona xizmatlari uchun" ordeni bilan Qoʻqon shahar tibbiyot birlashmasi shifokor-nevrologi Aziz Aliyev va Respublika ixtisoslashtirilgan pediatriya ilmiy-amaliy tibbiyot markazi laboranti Nazira Alimuhamedova mukofotlandi.
"Mehnat shuhrati" ordenini Fargʻona shahridagi Central Asian Medical University muassisi Nurillo Mamasadikov oldi.
I darajali "Sogʻlom avlod uchun" ordeni bilan sakkiz nafar mutaxassis, jumladan, tibbiyot markazlari rahbarlari, boʻlim mudirlari va AQShning Sent-Luis universiteti shifoxonasi shifokori Joldas Kuldjanov taqdirlandi.
II darajali "Sogʻlom avlod uchun" ordeni bilan yetti nafar mutaxassis, jumladan, mamlakatning turli hududlaridan akusherkalar, boʻlim mudirlari, oʻqituvchilar va tibbiyot xodimlari mukofotlandi.
"Doʻstlik" ordeni bilan xalqaro tashkilotlar vakillari hamda Oʻzbekiston va boshqa mamlakatlarning tibbiyot mutaxassislari taqdirlandi. Ular orasida BMT Taraqqiyot dasturining Oʻzbekistondagi doimiy vakili Akiko Fuji, Project C.U.R.E. tashkiloti vakillari, shuningdek, shifokorlar va tibbiyot muassasalari rahbarlari bor.
I darajali "Salomatlik" ordeni bilan neyroxirurg Abdufarrux Karimov, Allergologiya va klinik immunologiya markazi direktori Ilmira Razikova va oilaviy shifokor Nabijon Rahmatov mukofotlandi.
II darajali "Salomatlik" ordenini 16 nafar tibbiyot xodimi, jumladan, shifokorlar, klinikalar rahbarlari, hamshiralar va farmatsevtika sohasi mutaxassislari olishdi.
Bundan tashqari, sogʻliqni saqlash tizimi xodimlari "Jasorat", "Sodiq xizmatlari uchun", "Sogʻlom turmush", "Kelajak bunyodkori" va "Shuhrat" medallari bilan taqdirlandilar. Mukofotlanganlar orasida shifokorlar, hamshiralar, feldsherlar, tez yordam haydovchilari, farmatsevtlar va tibbiyot muassasalarining boshqa xodimlari bor.