Milliy gvardiya Toshkentda turistlardan pul undirgan koʻcha xonandasi Bozorboyni qoʻlga oldi. Video
Milliy gvardiya Toshkentda turistlardan pul undirgan koʻcha xonandasi Bozorboyni qoʻlga oldi. Video
Ijtimoiy tarmoqlarda «Chorsu» bozorida turistlar oldidagi tirqishqoqlik bilan qilgan chiqishlari orqali tanilgan koʻcha xonandasi Bozorboy ichki ishlar organlari boʻlimiga olib ketildi. Bunga bozor tashrif buyuruvchilaridan pul talab qilgan voyaga yetmagan bola ustidan tadbirkorlar qilgan murojaat sabab boʻldi.
Milliy gvardiya xabariga koʻra, xabar 17 sentyabr kuni taxminan soat 17:00 da kelib tushgan. Tadbirkorlar «Eski Joʻva» bozori hududida tilanchilik bilan shugʻullanayotgan voyaga yetmagan bola haqida maʼlum qilishgan.
Bozorda jamoat tartibini saqlashga jalb etilgan Milliy gvardiya harbiy xizmatchisi bolani topib, bozor hududidagi ichki ishlar organlari xonasiga olib borgan va profilaktika xizmati xodimlariga topshirgan.
Tekshiruv davomida bola tadbirkorlar va fuqarolardan, jumladan, turistlardan pul soʻragani aniqlandi. Idora xabariga koʻra, u pul berishni rad etganlarni haqorat qilgan va bezovta qilishda davom etgan.
Yosh ijrochi bundan avval ham auditoriya bilan ishlashning oʻziga xos usullari tufayli ijtimoiy tarmoqlarda muhokamalar mavzusiga aylangan edi. Xususan, Bozorboy «Chorsu»da xorijlik mehmonlar uchun qoʻshiq kuylagani, shundan soʻng chiqishi uchun ultimatum shaklida 100 ming soʻm talab qilgani aks etgan video keng rezonans uygʻotgan edi. Turist nizoni yumshatishga harakat qilib, 50 ming soʻm taklif qilganida, bola uning qoʻlidan 150 ming soʻmni tortib olgan.
Hozirda profilaktika xizmati xodimlari tekshiruv oʻtkazmoqda va sodir boʻlgan voqea tafsilotlarini aniqlamoqda.