Mikel Arteta “Arsenal” bilan yangi shartnoma bo‘yicha kelishuvga erishdi
Mikel Arteta “Arsenal” bilan yangi shartnoma borasida kelishuvga erishdi
“Arsenal” bosh murabbiyi Mikel Arteta klub bilan yangi shartnoma yuzasidan og‘zaki kelishuvga erishdi. Yangi bitim ispaniyalik mutaxassisning maoshini sezilarli darajada oshirishni ham ko‘zda tutadi. Bu haqda The Athletic xabar berdi.
Artetaning amaldagi shartnomasi 2026/27-yilgi mavsum oxirigacha amal qiladi. Tomonlar yangi kelishuv bo‘yicha muzokaralarni may oyida boshlagan, biroq yozgi transfer oynasi paytida jarayon vaqtincha to‘xtatilgan edi. Endi esa 44 yoshli murabbiyning “Arsenal”da kamida yana uch yil qolishi kutilmoqda.
Mikelning yangi shartnomasi bo‘yicha erishilgan kelishuv murabbiyning klubdagi kelajagi yuzasidan uzoq davom etgan muzokaralarga yakun yasaydi. Ispaniyalik mutaxassis avvalroq “Arsenal”da qolishni istashini aytgan va tomonlar albatta kelishuvga erishishiga shubha yo‘qligini bildirgan edi.
Yangi bitimning aniq muddati hozircha oshkor qilinmagan. Biroq xabarlarga ko‘ra, shartnoma Artetaning “Arsenal”dagi faoliyatini kamida 2029-yilgacha davom ettirishiga imkon beradi.
Artetaning yangi shartnomasi klubning murabbiylar shtabiga ham tegishli bo‘lishi kutilmoqda. Uning yordamchilari va boshqa murabbiylar bilan amaldagi kelishuvlarni yangilash jarayoni ham davom etmoqda.
Ma’lumot uchun, 44 yoshli Mikel Arteta 2019-yildan buyon “Arsenal”ni boshqarib kelmoqda. U London jamoasi bilan Angliya Kubogi, uch marta Angliya Superkubogi hamda o‘tgan mavsumda Angliya chempionligini qo‘lga kiritdi va klubga 22 yil kutilgan kubokni olib keldi. Londonliklar o‘tgan mavsumda Chempionlar ligasi finaliga ham yetib bordi, biroq hal qiluvchi uchrashuvda “PSJ”ga penaltilar seriyasida imkoniyatni boy bergandi.
Bundan tashqari, Mikel Arteta 2025/2026-yilgi mavsumda APLning eng yaxshi murabbiyi deb topilgan.