Messi va futbol tarixini o‘zgartirib yuborgan VHS videokassetasi
Rosariolik yulduz Ispaniya terma jamoasida o‘ynashi mumkin edi, ammo birgina videoyozuv uning taqdirini butunlay o‘zgartirib
**Messi va futbol tarixini o‘zgartirib yuborgan VHS videokassetasi**
Rosariolik yulduz Ispaniya terma jamoasida ham o‘ynashi mumkin edi, biroq bitta videoyozuv uning taqdirini butunlay o‘zgartirib yubordi.
Messining Argentina terma jamoasidagi afsonaviy yo‘li bugun — Benninga qarshi o‘rtoqlik uchrashuvi bilan yakuniga yetadi.
Leo allaqachon «albiseleste» ramziga, argentinaliklar va barcha futbol ishqibozlari xotirasida abadiy qoladigan afsonaga aylangan.
Lionel Andres Messi Argentinaning Rosario shahrida tug‘ilgan. Ammo agar u Ispaniya terma jamoasini tanlaganida, uning hayoti boshqacha kechishi ham mumkin edi. Bu ilmiy-fantastik taxmin emas, balki oddiy VHS videokassetasi sabab yo‘qqa chiqqan haqiqiy voqea edi.
2003 yil dekabrida 16 yoshli Leo Messi «Barselona»ning yoshlar jamoasi (Juvenil A) futbolchisi bo‘lib, Portudagi o‘rtoqlik o‘yinida asosiy tarkibda ilk bor maydonga tushgan edi. Uning jamoadoshlari (Pike, Sesk va Viktor Vaskes) muntazam ravishda Ispaniya yoshlar terma jamoalarida o‘ynashar va uni ham o‘z saflariga qo‘shilishga undashardi.
Yosh Leo esa o‘zini 100 foiz argentinalik deb bilardi va faqat milliy jamoasida to‘p surishni istardi. Ammo muammo shundaki, u 13 yoshida «Nyuells»ni tark etgani uchun vatanda uni hech kim tanimasdi va «Albiseleste»ning yoshlar jamoalariga hech qachon chaqirilmagan edi.
Shunda Leoning otasi klub matbuot xizmati xodimiga murojaat qiladi:
«Xayme, bizga Messi “Barselona”da o‘ynayotgan va gol urayotgan kadrlar tushirilgan video kerak. Chunki uni vatanimizda hech kim tanimaydi, sen esa u kimligini ularga tushuntirishga yordam berishing kerak».
Xorxe Messining iltimosi bajariladi:
Barça TV yosh iste’dodning reydlari va gollari jamlangan to‘plamni VHS kassetaga yozib beradi. Endi bu yozuvni Argentina federatsiyasidagi mas’ullarga yetkazish qolgan edi. Buning uchun imkoniyat 2003 yil 27 dekabrda Argentina terma jamoasi Kataloniyaga qarshi o‘rtoqlik o‘yini uchun Barselonaga kelganida paydo bo‘ldi.
Belsa o‘z ko‘zlariga ishonmasdi:
«Videoni odatiy tezlikda qo‘y, bunday tezlikda ko‘rib bo‘lmaydi».
Vivas esa video joyida ekanini aytadi. Gap shundaki, kichkina Leoning nihoyatda yuqori tezligi shunday tushunmovchilikka sabab bo‘lgan edi.
«U fenomen, bu bolaga bunchalik tez harakat qilishni kim o‘rgatgan?»
— deya hayratini yashira olmaydi Belsa.
Argentina jamoasi vatanga qaytadi va Vivas videokassetani Argentinaning 17 yoshgacha bo‘lgan o‘smirlar terma jamoasi murabbiyi Ugo Tokalliga quyidagi so‘zlar bilan topshiradi:
«Bu o‘yinchini boy bermang, argentinalik va futbol muxlisi sifatida sizdan o‘tinib so‘rayman».
Dastlab Tokalli bunga uncha e’tibor bermaydi va Finlyandiyada bo‘lib o‘tadigan o‘smirlar o‘rtasidagi Jahon chempionatiga olib ketiladigan tarkibdan biror futbolchini chiqarib tashlashni istamaydi.
Ammo Finlyandiyadagi turnir yarim finalida Ispaniya Argentinani mag‘lub etadi. Har ikki jamoa bir mehmonxonada yashagan va Ispaniya jamoasi oshpazi Tokalliga murojaat qilib shunday degan edi:
«Agar sizda “Barselona”da o‘ynaydigan o‘sha yigit bo‘lganida, bu jamoa bilan chempion bo‘lardingiz...»
Tokalli undan Leo Messini nazarda tutyapsizmi, deb so‘raydi. Bunga javoban oshpaz hayratga tushadi:
«Nima? Uni bilib turib olib kelmadingizmi?!»
Tokalli shunchaki tarkibni o‘zgartirishni istamagan edi, biroq yuz bergan voqealardan keyin u videokassetadagi yozuvni qayta ko‘rib chiqadi. Argentinaga qaytgach, Argentina futbol assotsiatsiyasi xodimiga Leoni jamoaga jalb qilish uchun uning oilasi bilan bog‘lanishni buyuradi.
Bu vazifa Omar Soutoga yuklanadi. U Rosariodagi barcha Messilarni qidirib, telefon kitobini varaqlaydi. Qidiruv chog‘ida u Leo ismining qisqartmasi deb o‘ylab, avval Leonardo ismli shaxslarni surishtiradi. Nihoyat, Leoning buvisi Seliya, keyin esa tog‘asi bilan bog‘lanadi va ular orqali futbolchining otasi Xorxe Messini topadi.
Ota telefon orqali quvonchdan qichqirib yuboradi:
«Ha, u Lionel! Nihoyat uni chaqirishibdi-da! O‘g‘lim Argentina uchun o‘ynashni juda xohlaydi!»
Argentina futbol assotsiatsiyasi «Barselona»ga terma jamoaning rasmiy chaqiruv xatini yuboradi. Qizig‘i, unda futbolchining ismi
«Leonel Mechchi» deb xato yozilgan edi. Ular hatto uning ismini qanday to‘g‘ri yozishni ham bilishmasdi. Shu tariqa ular kelajakda Argentina va jahon futboli tarixida Maradonaning vorisiga aylanishi kerak bo‘lgan ulkan o‘yinchini milliy jamoaga chaqirishgan edi.
2004 yil iyunida 17 yoshli Messi Argentinaning 20 yoshgacha bo‘lgan yoshlar terma jamoasi safida Paragvayga qarshi bahsda debyut qiladi. Yakunda uning fenomenal o‘yinlari evaziga Argentina yoshlar o‘rtasidagi Jahon chempionatida g‘olib chiqadi. U finalda jamoasining ikkita goliga ham mualliflik qiladi, turnir to‘purari va eng yaxshi o‘yinchisi bo‘ladi.
Ispaniya federatsiyasi ham bu o‘smirni «roxita» futbolkasida ko‘rishni juda istardi, ammo Leoning o‘z vataniga sadoqati va oddiy VHS videokassetasining ijobiy ta’siri uning taqdirini butun umrga «Albiseleste» bilan bog‘ladi.
Uning gollari, sovrinlari va qoldirgan ulkan merosi abadiydir. Ammo o‘sha kichik videotasma va Xorxe Messining tashabbusi bo‘lmaganida, futbol tarixi bugun butunlay boshqacha yozilgan bo‘lardi.