Mercedes-AMG trek uchun moʻljallangan CLE 646 modelini taqdim etdi

Mercedes-AMG trek uchun moʻljallangan CLE 646 modelini taqdim etdi

Mercedes-AMG quvvati 646 ot kuchiga teng boʻlgan ekstremal CLE 646 Spezialanfertigung kupesini namoyish qildi. Model atigi 30 nusxada ishlab chiqarilmoqda, qolaversa, barcha avtomobillar allaqachon oldindan sotilgan.

Yangi model Mercedes-Benz Mythos eksklyuziv seriyasining ikkinchi avtomobili boʻldi. Birinchisi Mercedes-AMG PureSpeed — tomi va old oynasi boʻlmagan ochiq ikki oʻrindiqli avtomobil boʻlib, u 250 nusxada ishlab chiqarilgan edi.

Muhandislar ikkita turbokompressor va yassi tirsakli valga ega 4 litrli benzinli V8 dvigatelini oʻrnatishgan. Dvigatel 646 ot kuchi va 850 N·m quvvat beradi hamda toʻqqiz pogʻonali AMG SpeedShift TCT 9G uzatmalar qutisi bilan birgalikda ishlaydi.

Kupe 100 km/soat tezlikka 3,9 sekundda, 200 km/soatga esa 11,4 sekundda erishadi. Maksimal tezlik 310 km/soatni tashkil etadi, trek rejimida 300 km/soatgacha tezlanish uchun esa 36,8 sekund kerak boʻladi.

Old va orqa gʻildiraklar izining kengligi 60 mm ga oshirilgan, kuzovning oʻzi esa kuchaytirilgan konstruksiyaga ega boʻldi. Kuzov elementlari asosan uglerod tolasidan yasalgan: qanot kengaytirgichlari, kapot, tom, ostonalar, shuningdek, sozlanuvchi orqa antikrilo ham shu materialdan ishlangan.

Yengillashtirilgan materiallardan keng foydalanish hisobiga avtomobil vazni taxminan 170 kg ga kamaytirildi. Natijada uning vazni 1895 kg ni tashkil etadi.

Kupe old tomonda 420×40 mm va orqada 360×32 mm oʻlchamdagi diskli keramik tormozlar bilan jihozlandi.

Aerodinamikaga alohida eʼtibor qaratildi. Old diffuzorni qoʻlda yoʻl va trek rejimlari oʻrtasida oʻzgartirish mumkin, orqa antikrilo ham sozlanadi. Old qanotlarda gʻildirak arkalaridan havoni chiqarib yuborish uchun maxsus jalyuzilar paydo boʻldi, faralar yonidagi kanallar esa havo oqimini shu teshiklarga yoʻnaltiradi.