«Men şu yerdaman»: Maçado qariyb bir yildan söng Venesuelaga qaytdi

«Men şu yerdaman»: Maçado qariyb bir yildan keyin Venesuelaga qaytdi

«Men şu yerdaman. Sizlar bilan», — deb yozdi Maçado 25-oktabr kuni X ijtimoiy tarmog‘ida.

DW xabariga ko‘ra, 59 yoshli siyosatchining qaytganini uning safdoshi, prezidentlikka sobiq nomzod Edmundo Gonsales Urrutia ham tasdiqlagan. U bu kunni venesuelaliklar uchun juda muhim deb atagan. Maçadoning aynan qayerdaligi va qaytish tafsilotlari hozircha oshkor qilinmagan.

Bundan uch kun avval, 22-oktabrda Venesuelada minglab namoyishchilar Maçadoning qaytishini talab qilgan edi. AFP ma’lumotiga ko‘ra, Karakasda qariyb ikki ming kishi ko‘chaga chiqqan, ayrimlari saylov o‘tkazish talabi yozilgan plakatlarni ko‘tarib olgan. Kolumbiya bilan chegaradosh Tachira shtatida ham shunday aksiya bo‘lib o‘tgan.

Maçado 2024-yildagi bahsli prezidentlik saylovidan keyin yashirinib yashagan va 2025-yil dekabrida Venesuelani maxfiy ravishda tark etgan.

AFP eslatishicha, u yog‘och baliqchi qayig‘ida mamlakatdan chiqib ketayotganda umurtqalaridan biri singan. Nobel tinchlik mukofotini topshirish marosimi uchun Norvegiyaga yetib borgach, Oslodagi shifoxonalardan biriga yotqizilgan. Mukofotni uning nomidan qizi qabul qilgan.

AQSh Davlat departamenti avvalroq Karakas hukumati va muxolifat o‘rtasidagi muzokaralarning navbatdagi bosqichi yakunlanganini ma’lum qilgan. Nikolas Maduro AQSh tomonidan qo‘lga olinganidan keyin hukumatga vaqtincha Delsi Rodriges rahbarlik qilmoqda.

Davlat kotibi Marko Rubio Maçadoning xavfsiz qaytishi uchun sharoit yaratilganini AQSh qo‘llab-quvvatlayotgan yarashuv muzokaralarining bevosita natijasi deb baholagan. Xabarda qayd etilishicha, muzokaralar davomida yuzlab siyosiy mahbuslar ozod qilingan, yana yuzlab muxolifatchilar muhojirlikdan qaytgan.

Venesuelada 2024-yilgi prezidentlik saylovidan keyin hukumat Nikolas Maduroni g‘olib deb e’lon qilgan edi. Muxolifat esa natijalarni tan olmay, eng ko‘p ovozni o‘z nomzodi Edmundo Gonsales Urrutia olganini bildirgan.

Maduro yanvar boshida Karakasda AQSh harbiylari tomonidan qo‘lga olinib, Nyu-Yorkka olib ketilgan. Unga, jumladan, «narkoterrorizm» bo‘yicha ayblovlar qo‘yilgan.