Meksikada sobiq prokurorga AQShning giyohvand moddalarga qarshi reydi boʻyicha davlatga xoinlik ayblovi qoʻyildi
Sesar Xauregi Moreno aprel oyida AQSh agentlariga giyohvand moddalar ishlab chiqarishda gumon qilingan laboratoriyadagi reydda qatnashishga ruxsat berganlikda ayblanmoqda.
**Meksikada sobiq prokuror AQShning giyohvand moddalarga qarshi reydi sababli davlatga xoinlikda ayblandi**
Meksika federal prokurorlari sobiq shtat prokuroriga qarshi davlatga xoinlik ayblovini ilgari surdi. U AQSh agentlariga tegishli ruxsatsiz aprel oyida gumon qilingan narkolaboratoriyada oʻtkazilgan reydda ishtirok etishga ijozat berganlikda ayblanmoqda.
Sesar Xauregi Moreno 2023 yildan to shu yilgacha shimoliy chegaradagi Chiuaua shtati bosh prokurori boʻlib ishlagan.
Amerikaliklarning roli Markaziy razvedka boshqarmasi (TSRU)da ishlagani aytilgan ikki nafar AQSh agenti Chiuauada meksikalik ikki huquq-tartibot xodimi bilan birga avtohalokatda halok boʻlganidan keyin maʼlum boʻldi.
Bosh prokuror Ernestina Godoy Ramosning taʼkidlashicha, Xauregi xorijiy agentlarga faqat Meksika hukumati vakolatiga kiradigan vazifalarni bajarishga ruxsat bergan va maʼlumotlarni baham koʻrmagan. Xauregi bu ayblovlarni rad etdi.
Konservativ muxolifatdagi PAN partiyasi aʼzosi boʻlgan sobiq prokuror dam olish kunlari hibsga olingan. Sud majlisi shanba kuniga belgilangan.
Reuters xabariga koʻra, sudya ish boʻyicha keyingi surishtiruvlarni davom ettirish uchun yetarli dalillar bor-yo'qligini hali hal qilishi kerak.
Xauregi, shuningdek, Chiuaua shtatida xizmat mavqeini suisteʼmol qilish kabi ayblovlarga ham duch kelmoqda. Yakshanba kuni ushbu ayblovlar boʻyicha oʻtkazilgan sud majlisida u AQSh agentlarining operatsiyada ishtirok etishiga buyruq bergani yoki rozilik berganini rad etdi.
Meksika Prezidenti Klaudiya Sheynbaum AQSh Prezidenti Donald Tramp tomonidan giyohvand moddalar noqonuniy aylanishiga qarshi kurashni kuchaytirish borasida bosimga uchramoqda, ammo u Meksikada AQSh boshchiligidagi giyohvand moddalarga qarshi operatsiyalar oʻtkazish takliflarini rad etib kelmoqda.
U xorijiy rasmiylar Meksika hududida faqat oldindan federal ruxsat olingan holda faoliyat yuritishi mumkinligini taʼkidlab, Lotin Amerikasi mamlakati suvereniteti buzilmasligi kerakligini uqtirmoqda.
Halokat 19 aprel kuni, chekka togʻli hududdagi gumon qilingan metamfetamin laboratoriyalariga qarshi operatsiyadan qaytayotgan avtokarvon yoʻldan chiqib ketib, jarlikka qulashi oqibatida yuz bergan.
Rasmiylarning bildirishicha, Chiuaua shtati qidiruv agentligining ikki xodimi amerikaliklar bilan birga halok boʻlgan.
Oʻsha paytda shtat bosh prokurori sifatida soʻzlagan Xauregi matbuot anjumanida amerikaliklar AQSh elchixonasining "yoʻriqchi zobitlari" boʻlganini va ular "AQSh hukumati bilan olib borilayotgan umumiy va normal almashinuv doirasida oʻquv ishlarini" amalga oshirayotganini aytgan edi.
AQSh ommaviy axborot vositalarining xabar berishicha, ushbu ikki shaxs mintaqada giyohvand moddalar noqonuniy aylanishiga qarshi kurashni kengaytirish harakatlari doirasida TSRUda ishlagan.