Mehmonxonalar qurishga subsidiyalar berish 2029-yilgacha davom ettiriladi
O‘zbekiston Respublikasi Prezidentining 27-avgust kuni imzolagan farmoni bilan tadbirkorlar uchun bir qator imtiyozlarning amal qilish muddatlari uzaytirildi.
Farmonga ko‘ra, uch, to‘rt va besh yulduzli mehmonxonalar qurish uchun beriladigan subsidiyalar muddati 2029-yil 1-yanvargacha uzaytirildi. Shuningdek, mehmonxonalar va boshqa joylashtirish vositalarining mol-mulk va yer solig‘i stavkalariga nisbatan 0,1 koeffitsiyentni qo‘llash muddati 2030-yil 1-yanvargacha uzaytirildi.
Davlat rahbari 2026-yil 18-avgust kuni tadbirkorlar bilan ochiq muloqot chog‘ida uch, to‘rt va besh yulduzli mehmonxonalar qurish uchun subsidiya berish muddati yana ikki yilga uzaytirilishini ma’lum qilgan edi.
Farmon bilan, shuningdek, turizm sohasi subyektlari uchun import qilinadigan avtobus, elektrobus va mikroavtobuslar uchun bojxona bojidan ozod etish muddati 2028-yil 1-yanvargacha uzaytirildi.
2027-yil 1-yanvardan boshlab quyidagi o‘zgarishlar kuchga kiradi:
* O‘zbekiston rezidenti bo‘lgan turoperatorlarning xorijiy sayyohlarga ko‘rsatgan xizmatlariga QQSning nol stavkasi qo‘llanadi.
* Yulduzli mehmonxonaga subsidiya olish uchun uning toifasini tasdiqlashda xorijiy kompaniyalar xulosasi talab etilmaydi.
Bundan tashqari, mazkur farmon bilan qiymati BHMning 400 baravaridan oshadigan tovar va xizmatlar uchun to‘lovlar faqatgina bank kartalari yoki elektron to‘lov tizimlari orqali amalga oshirilishi belgilandi. Ilgari bu miqdor 25 million so‘m etib belgilangan edi.
Qarorga ko‘ra, 1-noyabrdan boshlab tadbirkorlar uchun elektr va gaz bo‘yicha oldindan to‘lov 15 foizga tushirilishi, tadbirkorlar uchun “Ikkinchi imkon” iqtisodiy amnistiyasi e’lon qilinishi, tadbirkorlarga moliyaviy jarima qo‘llashda birinchi xato uchun ogohlantirish qoidasi joriy etilishi, kichik tadbirkorlik subyektlarini tekshirishga 3 yilga moratoriy joriy etilishi ham belgilandi.
Hujjatda qayd etilishicha, ushbu chora-tadbirlar Prezidentning tadbirkorlar bilan har yilgi anʼanaviy ochiq muloqoti hamda uni tashkil qilish doirasida oʻtkazilgan uchrashuvlarda kelib tushgan 14 mingga yaqin murojaatda koʻtarilgan tizimli muammolarning yechimiga qaratilgan taklif va tashabbuslarni amalga oshirish maqsadida qabul qilingan.