Megan Markl janjal sababli Gay Richining serialidagi rolidan ayrildi

Megan Markl janjal tufayli Gay Richining "Jentlmenlar" serialidagi rolidan mahrum bo‘ldi.

Tengri Life The Independent nashriga tayanib xabar berishicha, Megan Markl Gay Richining Netflix’dagi "Jentlmenlar" serialining uchinchi mavsumida ishtirok etmasligi mumkin.

**Nima bo‘ldi?**

Vanity Fair va New York Magazine jurnallarining sobiq bosh muharriri Tina Braunning so‘zlariga ko‘ra, Marklning loyihadagi ishtiroki haqidagi qaror Buyuk Britaniyada yuzaga kelgan keskin munosabatlardan so‘ng qayta ko‘rib chiqilgan.

Avvalroq Sasseks gersoginyasi Netflix serialining yangi mavsumida aktyorlikka qaytish bo‘yicha muzokaralar olib borayotgani haqida xabar berilgandi. Bu yangilik Britaniya ommaviy axborot vositalarida qizg‘in muhokamalarga sabab bo‘ldi, endi esa bu g‘oyadan voz kechilgani haqida ma’lumot paydo bo‘ldi.

Tina Braun o‘zining Substack sahifasida rejalar o‘zgarganini ma’lum qildi. U shunday yozdi: “Bugun ertalab Gay Richi serialining uchinchi mavsumi uchun Megan Markl bilan o‘tkazilishi kerak bo‘lgan kasting bekor qilinganini bildim”.

Uning so‘zlariga ko‘ra, bunga Marklning loyihada ishtirok etishi mumkinligiga bildirilgan munosabat sabab bo‘lgan. Braun qo‘shimcha qildi: “Buyuk Britaniyadagi salbiy munosabat shu qadar kuchli ediki, ishni davom ettirishning iloji qolmadi”.

Shu bilan birga, na Netflix, na Meganning o‘zi, na Gay Richi bu ma’lumotni rasman tasdiqlagan.

**Bu nega bunday munosabatga sabab bo‘ldi?**

Avvalroq Megan Marklning “Jentlmenlar” seriali uchinchi mavsumidagi rollardan biriga nomzodi ko‘rib chiqilayotgani xabar qilingan edi. Variety nashri ma’lumotlariga ko‘ra, aktrisa serial ijodkorlari bilan muzokaralar olib borgan. Yangi mavsumni Buyuk Britaniyada suratga olish, bosh rollarni esa Teo Jeyms va Kaya Skodelario ijro etishi rejalashtirilgandi.

Shu bilan birga, uchinchi mavsum hali Netflix tomonidan rasman tasdiqlanmadi. Ikkinchi mavsum esa 3-sentyabr kuni platformada namoyish etiladi.

Marklning “Jentlmenlar” serialidagi ehtimoliy rolga qiziqish uning aktyorlik faoliyatiga qaytishi bilan ham bog‘liq edi. 2017-yilda u shahzoda Garri bilan unashtirilgach, aktrisalik faoliyatini to‘xtatgan.

Bungacha Markl yetti mavsum davomida “Fors-majorlar” serialida Reychel Zeyn rolini ijro etgan, shuningdek, “Badjahl xo‘jayinlar”, “3 kunda qanday turmushga chiqish mumkin?” va “Tasodifiy uchrashuvlar” filmlarida suratga tushgan.

To‘g‘ri, u yaqinda ekranga qaytdi — biroq kichik bir epizod bilan. Markl “Yaqin do‘stlar” komediyasida o‘z rolini ijro etdi. Amazon MGM studiyasining ushbu filmida Lili Kollinz va Bri Larson ham rol o‘ynagan. Bu uning qariyb o‘n yil ichida ekranda ilk bor ko‘rinish berishi bo‘ldi.

Serialdagi ehtimoliy rol haqidagi mish-mishlar Megan Markl va shahzoda Garrining AQShdan Buyuk Britaniyaga ko‘chib o‘tishi to‘g‘risidagi xabarlardan so‘ng OAVda paydo bo‘ldi. Ota-onasi bilan birga ularning farzandlari — shahzoda Archi va malika Lilibet ham mamlakatga qaytishi kerak. Xabarlarga ko‘ra, ular Britaniya maktablarida o‘qiydi.

Tina Braunning yozishicha, Marklning Buyuk Britaniyadagi aktyorlik loyihasi ushbu qarorning sabablaridan biri bo‘lishi mumkin edi. Agar uning kasting bekor qilingani haqidagi ma’lumoti tasdiqlansa, aktrisaga Britaniya kino sanoatidagi faoliyatiga doir rejalarini qayta ko‘rib chiqishga to‘g‘ri keladi.

**“Jentlmenlar” haqida nimalar ma’lum?**

“Jentlmenlar” seriali — Gay Richining 2019-yilda Metyu Makkonaxi, Charli Xannem va Kolin Farrell ishtirokida suratga olingan shu nomdagi filmida boshlangan hikoyaning davomidir. Shu bilan birga, serial film syujetini takrorlamaydi: unda o‘sha jinoiy-komedik olamda yangi qahramonlar va alohida hikoya paydo bo‘lgan.