Mbappening jarohati Zidanning debyutini buzdi, Xvicha penaltini urolmadi
Italiya va Belgiya oʻrtasidagi uchrashuvda ham yangi bosh murabbiylar debyut qildi, Manchini va van Bommel duelida niderlandiyalik mutaxassisning qoʻli baland keldi.
Mbappening jarohati Zidanning debyutiga soya soldi, Xvicha penaltidan foydalana olmadi
Juma oqshomida Millatlar ligasi guruh bosqichidagi 1-tur bahslari davom etdi.
Mbappe gol urdi va jarohat oldi
Turkiya – Fransiya 0:1
Mbappe, 54 (0:1)
Zinedin Zidan Fransiya milliy jamoasidagi ishini xuddi Mishel Platini singari boshladi: 1988-yildan beri «uchranglilar» bosh murabbiylarining debyuti turnir o‘yinlariga to‘g‘ri kelmayotgandi. Fransiya terma jamoasi ustozi Dembeleni milliy jamoada «to‘qqizlik» pozitsiyasida maydonga tushirib, ko‘pchilikni hayratda qoldirdi. Biroq o‘sha kuni mehmonlarning hujum chizig‘idagi bu tajriba o‘zini oqladi, deb aytish qiyin, chunki jamoaning darvoza tomon ilk zarbasi faqat birinchi bo‘lim oxiriga kelib amalga oshdi. 43-daqiqada hisob ochilishi mumkin edi, ammo Chaqir Olisening murakkab zarbasidan keyin yuqori burchakka ketayotgan to‘pni barmoqlari uchida qaytarib qoldi.
Ikkinchi bo‘lim boshida esa fransuzlar darvozaboni Menyan ham ajoyib seyv amalga oshirishga majbur bo‘ldi. U Yuksakning bosh bilan yo‘llagan zarbasidan keyin gazonga cho‘pchigan holda kelgan to‘pni to‘sin ustidan chiqarib yuborishga muvaffaq bo‘ldi.
Bir necha daqiqa o‘tib fransuzlar kuchli pressing uyushtirishdi, to‘p olib qo‘yilgach Olise chap qanotdan jarima maydoniga kirib kelgan Mbappeni to‘p bilan ta’minladi. Kilian esa hech qanday qarshiliksiz darvozani ishg‘ol etdi. Bu «Real» forvardining milliy jamoa sardori sifatida urgan 31-goli bo‘lib, u Platinining bu boradagi rekordini takrorladi. Bundan tashqari, u yil boshidan buyon Fransiya uchun urgan gollari sonini 12 taga yetkazib, 2022-yildagi shaxsiy rekordini ham takrorladi. Ammo ushbu hujumchi ko‘rsatkichlarini yaxshilay olmadi va jarohat olib, maydonni tark etishga majbur bo‘ldi. U golni nishonlash paytidayoq oqsoqlanayotgan edi va bir necha daqiqa o‘tib chap tizzasini ushlagancha gazonga yotib oldi hamda o‘rnini Dezire Duega bo‘shatib berdi.