Mashhur hind moliyaviy blogerining oʻz joniga qasd qilishidan soʻng Yutuber hibsga olindi

Hindistonlik mashhur moliyaviy inflyuenserning oʻz joniga qasd qilishidan soʻng bloger qoʻlga olindi

V Harish "Finance with Harish" deb nomlangan juda ommabop Instagram sahifasini yuritgan

Hindistonda 27 yoshli moliyaviy inflyuenserning oʻz joniga qasd qilishi kiberbulling (tarmoqdagi taʼqib) ayblovlari bilan chirmashib ketdi va investorlarga kim moliyaviy maslahat berishga haqli ekani haqida bahslarga sabab boʻldi.

"Finance with Harish" nomli koʻp sonli kuzatuvchilariga ega Instagram akkauntini boshqargan V Harish seshanba kuni ertalab Hindiston janubidagi Tamilnadu shtati poytaxti Chennai yaqinidagi uyida oʻlik holda topilgan.

Uning oʻlimi Meta kompaniyasi tomonidan qoidabuzarliklar haqidagi shikoyatlardan soʻng uning akkaunti blokga tushirilganidan bir necha hafta oʻtib yuz berdi.

Militsiyaga berilgan arizada uning otasi J Vinayagam oʻgʻli "Zemuria" texnologiya venchur studiyasi bosh ijrochi direktori va bloger Jeyson Samuel tomonidan internetdagi taʼqiblar sababli oʻz joniga qasd qilganini taʼkidladi.

Militsiya Samuelni payshanba kuni kechqurun "Harishdan pul undirishga urinish" va "sotsial tarmoqlarda unga qarshi tuhmatona videolar joylashtirish"da gumon qilib qoʻlga oldi.

U bundan oldin X (Tvitter)dagi postida hech qanday noqonuniy ish qilmaganini rad etgan edi.

Ushbu dekloratsiya Hindistonda moliyaviy kontent yaratuvchilarning taʼsiri kengayayotganini koʻrsatdi, u yerda millionlab yangi investorlar bozor boʻyicha yoʻriqnoma olish uchun ijtimoiy tarmoqlarga tobora koʻproq tayanmoqda.

Harish taxminan besh yil oldin moliya va investitsiyaga oid videolarni joylashtirishni boshlagan va katta onlayn auditoriya yigʻgan.

Vaqt oʻtishi bilan u 1500 dan ortiq video yuklagan va 1,3 milliondan ortiq Instagram kuzatuvchilariga ega boʻlgan. U oʻzini "millionerlar" va "yirik kapitalga ega shaxslar"ning moliyaviy maslahatchisi sifatida taʼriflagan.

U aktsiyalar bozorining koʻtarilishi va tushishi hamda oltin va kumush narxlarini muhokama qilishda dramatik videolar yaratish uchun musiqa, film parchalari va jahon siyosiy yetakchilarining soʻnggi suratlaridan tez-tez foydalangan.

Moliyaviy mavzularni oddiy tilda tushuntirib bergan bu videolar, ayniqsa 2020 yilgi Kovid-19 pandemiyasidan beri Hindistonda chakana investorlar bazasining keskin oʻsishiga toʻgʻri kelgani uchun juda ommalashib ketdi.

Shu yil boshida Hindistonning eng yirik fond birjasi boʻlmish Milliy fond birjasi 2019 yildagi 30 milliondan kam boʻlgan koʻrsatkichga nisbatan hozirda 130 milliondan ortiq yagona roʻyxatdan oʻtgan investorlarga ega ekanini maʼlum qildi.

Biroq sentyabr oyida Meta Harishning Hindiston bozorini tartibga soluvchi Qimmatli qogʻozlar va birjalar kengashida (Sebi) roʻyxatdan oʻtmagani haqida shikoyatlar olganidan soʻng uning Instagram sahifasini oʻchirib tashladi, vaholanki investitsiya boʻyicha maslahat berish yoki kliyentlar portfelini boshqarish uchun qonunan shunday roʻyxatdan oʻtish talab qilinadi.

Tez orada 60 000 dan ortiq kuzatuvchini jalb qilgan zaxira akkaunti ham keyinchalik olib tashlandi.

Instagramda uning nomi ostida yana bir nechta akkauntlar saqlanib qolgan, ammo ularning kuzatuvchilari juda kam va ularni kim boshqarishi nomaʼlum.

Harishning doʻstlari va oilasiga tayanib NDTV xabar berishicha, u oʻlimidan oldin videomurojaat yozib olgan va unda "besh yillik mehnati oʻgʻirlanganini" aytgan.

Ijtimoiy tarmoqlarda keng tarqalgan videoda u ota-onasi, singlisi, doʻstlari va kuzatuvchilariga "Juda afsusdaman" deyishdan oldin tamil tilida gapirib, soʻng ingliz tiliga oʻtganini koʻrish mumkin.

Meta Harishning akkauntini Sebida roʻyxatdan oʻtmagani haqidagi shikoyatlardan soʻng oʻchirib tashladi, bu esa qonunga koʻra investitsiya boʻyicha maslahat berish yoki kliyentlar portfelini boshqarish uchun zarurdir.

Militsiyaning bildirishicha, Harishning otasi J Vinayagam oʻgʻlining oʻlimida "kiberbulling, ijtimoiy tarmoqlardagi tuhmatona postlar va uning kanallarini qayta-qayta bloklanishi"ni aybladi va Chennai yaqinidagi Kanatur militsiya boʻlimiga topshirgan arizasida Jeyson Samuelning nomini keltirdi.

Samuel 18 oktyabr kuni oʻzining Yutub kanalida Harishda Sebi yoki Amfi (Hindistondagi Pay fondlari assotsiatsiyasi) roʻyxatidan oʻtmagani sababli uning vakolatlarini soʻroq ostiga oluvchi video joylashtirgan edi. Videoda u Harishning Instagram akkaunti shikoyatlardan soʻng oʻchirilganini aytgan.

Vinayagamning aytishicha, bu narsa shafqatsiz onlayn taʼqiblarni keltirib chiqargan va oʻgʻlini oʻz joniga qasd qilishga majbur qilgan bosimlarni yaratgan.

"Biz tegishli tergov oʻtkazilishini hamda ijtimoiy tarmoqlarda tuhmat tarqatgan va kiberbulling orqali ruhiy aziyat yetkazgan Jeyson Samuel va uning sheriklariga nisbatan qonuniy chora koʻrilishini talab qilamiz", deyiladi uning arizasida.

Militsiya bayonotida aytilishicha, Vinayagamning arizasi "oʻzini oʻzi oʻldirish darajasiga yetkazish" moddasi boʻyicha roʻyxatga olingan va dastlabki tergov Samuelning "ushbu ishda aloqasi" borligini aniqlagan.

"[Samuel] sudga olib kelinadi va qamoqqa olinadi", deyiladi unda.

Samuel Harishning vakolatlari yoʻqligi haqida xavotir bildirgan videosini himoya qilib, isteʼmolchilar manfaati uchun harakat qilganini aytdi.

X (Tvitter)dagi bayonotida Samuel "yuz bergan hodisadan chuqur qaygʻudaman, iztirobdaman, shokdaman va qotib qoldim hamda bu judolik uchun motam tutaman" dedi.

Biroq, u Harishni "kiberbulling" qilgani haqidagi ayblovlarni rad etdi.

"Men uni kiberbulling qilmadim. Men unda litsenziya va vakolat yoʻqligini, litsenziyani soxtalashtirish va firibgarlikni... uning noqonuniy faoliyatini koʻrsatib berdim.

Men videoda undan qaytib kelib, buni tegishli Sebi litsenziyasi bilan qilishni soʻradim. Men hech qachon bunday keskin chora boʻlishini niyatida boʻlmaganman yoki kutmaganman va bu yoʻqotishdan qaygʻudaman", deb yozdi u.