Marosim kivi patlaridan toʻqilgan toʻnning vataniga qaytganini nishonladi
Maori targʻibotchilarining aytishicha, 1900 yilda britan shifokoriga berilgan kaxu kivi «uyga qaytish uchun yigʻlayotgan edi».
Kivi patlaridan tikilgan toʻnning uyga qaytishiga bagʻishlangan marosim oʻtkazildi
Maori qabilasiga tegishli kivi patlaridan tikilgan toʻnning Britaniya muzeyidan Yangi Zelandiyaga qaytarilganini nishonlash uchun marosim boʻlib oʻtdi.
Kaxu kivi (toʻn) 1900 yilda maori yetakchilari tomonidan Yangi Zelandiyada ishlagan shifokor, doktor Jorj Klegxornga berilgan xayrlashuv sovgʻalaridan biri edi.
1913 yilda Klegxornning beva ayoli uni Oksforddagi Pitt Rivers muzeyiga vaqtinchalik foydalanishga topshirgan.
Repatriatsiya xarajatlarini qoplagan «Homebound Project» xayriya tashkiloti toʻn «uyga qaytish uchun yigʻlayotgan edi», deb bayonot berdi.
Hozirda ushbu buyumga egalik qilayotgan «Ngāti Rārua o Te Wairau Society» tashkiloti raisi, doktor Lorreyn Id uning ahamiyatini «oʻlchab boʻlmaydigan darajada yuqori» deb atadi.
Uning taʼkidlashicha, toʻnning qaytarilishi Klegxornning maori xalqi uchun qilgan xizmatlarini eʼtirof etish imkoniyatini berdi.
Pitt Rivers muzeyining maʼlum qilishicha, ushbu shifokor maorilarning tibbiy yordam olish uchun uzoqroqqa borishga majbur boʻlmasdan, mahalliy shifoxonadan foydalanish huquqiga ega boʻlishi uchun kurashgan.
Qoʻshimcha qilinishicha, u oilalarga j Amotli sogʻliqni saqlash chora-tadbirlarining muhimligini tushuntirish uchun ularning xonadonlariga tashrif buyurishga ham vaqt ajratgan.
Maori maʼmuriyati — «Te Rūnanga o Ngāti Rārua» bosh ijrochi direktori Sheyn Grem bu qaytishni muhim voqea deb atadi.
«Bu manani [obroʻ-eʼtiborni] tiklaydi va ushbu taonga [xazina] bilan mustahkam maʼnaviy hamda madaniy aloqamizning chuqur ahamiyatini ulugʻlaydi», dedi u.
Pitt Rivers muzeyi direktori, professor Lora Van Brukxoven shunday dedi: «Kaxu Kivining uyga qaytish kuni kelganidan juda mamnunmiz».
Avvalroq Oksfordda toʻnning joʻnab ketishi munosabati bilan marosim oʻtkazilgan edi.