Markaziy Osiyo energetika tizimida o‘zaro bog‘liq uzilishlar kuzatildi
O‘zbekistonning Surxondaryo va boshqa ayrim viloyatlarida, shuningdek qo‘shni mamlakatlarning Olmaota, Bishkek va Dushanbe shaharlarida elektr ta’minoti uzilib qoldi.
Markaziy Osiyo energetika tizimida bir-biriga bog‘liq uzilishlar yuz berdi. Mintaqaning yagona energetika tizimiga ta’sir ko‘rsatgan avariya natijasida O‘zbekistonning Surxondaryo va boshqa ayrim viloyatlarida elektr ta’minoti uzildi.
O‘zbekiston Energetika vazirligi avariya qaysi mamlakatda sodir bo‘lganini oshkor etmagan holda bu haqda ma’lum qildi. Vazirlik xabarida aytilishicha, "Hozirgi vaqtda energetiklar tomonidan elektr ta’minoti bosqichma-bosqich tiklanmoqda. Qo‘shimcha ma’lumot beriladi".
"O‘zbekiston milliy elektr tarmoqlari" AJ ma’lumotiga ko‘ra, yagona energetika tizimida bir necha pog‘onali avariyaga qarshi avtomatika tizimi ishga tushgan.
Kaktus.media nashrining yozishicha, Qirg‘iziston poytaxti Bishkek, Qozog‘istonning eng yirik shahri Olmaota va Tojikiston poytaxti Dushanbeda elektr energiyasidagi ommaviy uzilishlar haqida xabarlar mavjud.
Tengrinews xabariga ko‘ra, KEGOC kompaniyasiga tegishli elektr uzatish tarmoqlarida avariyaga qarshi avtomatika tizimi 300 MVt quvvat bilan o‘chgan, buning natijasida Olmaota shahri va Olmaota viloyatidagi 10 ta tumanda elektr ta’minoti uzilib qolgan. Shaharda metro harakati to‘xtab qolgani ham aytilmoqda.