“Manchester Siti” “Roma” yarimhimoyachisini nishonga oldi — The Guardian

“Manchester Siti” “Roma”ning fransiyalik yarimhimoyachisi Manu Koneni o‘z safiga qo‘shib olish imkoniyatini ko‘rib chiqmoqda, deya xabar beradi The Guardian. Angliya klubi 25 yoshli futbolchining taxminiy transfer narxini 50 million funt sterling atrofida baholamoqda.

“Shaharliklar” Konening maydondagi faolligi va xalqaro tajribasi jamoa o‘yinini sezilarli darajada kuchaytiradi, deb hisoblamoqda.

Hozirda “Manchester Siti” yarimhimoya chizig‘ini yangilash bilan band. Klub allaqachon “Nottingem Forest”dan Elliot Andersonni 116 million funtga sotib olgan. Shuningdek, “Lill”ning 18 yoshli futbolchisi Ayyub Buaddining 85 million funtlik transferini yakunlash arafasida turibdi. Shu bilan birga, jamoaning asosiy tayanch yarimhimoyachisi Rodri 65 million funt evaziga “Barselona”ga o‘tgan.

Yangi xarid qilingan Anderson tajribali futbolchi bo‘lsa-da, 18 yoshli Buaddida yuqori darajadagi o‘yin amaliyoti hali yetarli emas. Shu sababli Konening tajribasi jamoaga juda kerak bo‘lishi mumkin.

Ma’lumot uchun, Manu Kone yakunlangan mavsumda “Roma” tarkibida jami 37 ta o‘yinda maydonga tushib, 2 ta gol urgan va 3 ta golli uzatmaga mualliflik qilgan. Uning rimliklar bilan shartnomasi 2029-yilning yoziga qadar amal qiladi. Transfermarkt portali Konening bozor qiymatini 50 million yevroga baholagan.