“Manchester Siti” Rodrining transferi bo‘yicha “Barselona”ga yana “yo‘q” dedi — The Times

“Manchester Siti” “Barselona”ning Rodri bo‘yicha ikkinchi taklifini ham rad etdi — The Times

Angliyaning “Manchester Siti” futbol klubi yarimhimoyachi Rodri transferi yuzasidan “Barselona”dan kelgan ikkinchi taklifni ham qabul qilmadi. Bu haqda The Times nashri xabar berdi.

Avvalroq, Kataloniya klubi ispaniyalik xavbek uchun Angliya chempioniga 60 million yevro atrofida mablag‘ taklif qilgani ma’lum bo‘lgan edi. Manbaga ko‘ra, “shaharliklar” bu taklifni qoniqarsiz deb topgan va o‘z futbolchisi uchun taxminan 80 million yevro talab qilmoqda.

Xabarlarga ko‘ra, muzokaralarda “Barselona” foydasiga ishlayotgan eng muhim omillardan biri Rodrining amaldagi shartnomasi bilan bog‘liq vaziyatdir. Ispaniyalik futbolchi va “Manchester Siti” o‘rtasidagi kelishuv tugashiga atigi bir yil qolgan. Rodri esa ingliz klubi bilan hamkorlikni uzaytirishni istamayapti.

Bu holat “Siti”ning rejalari va qarorlariga jiddiy ta’sir ko‘rsatadi. Klub o‘zining asosiy futbolchilaridan birini arzon narxda sotishni xohlamayapti. Ammo Rodrining shartnomasini uzaytirmasdan turib, so‘nggi yilini klubda o‘tkazishiga ruxsat berish kelajakda inglizlar uchun bundan-da kattaroq muammolarni keltirib chiqarishi mumkin. Aynan mana shu holat “Barselona” foydasiga ishlamoqda.

30 yoshli Rodri 2025/2026-yilgi mavsumda Angliya Premyer Ligasida jami 21 ta uchrashuvda maydonga tushib, bitta gol urishga muvaffaq bo‘lgan. Shuningdek, u Chempionlar Ligasida 5 ta o‘yinda ishtirok etgan.