«Manchester Siti» moliyaviy qoidalarni misli koʻrilmagan darajada buzganlikda ayblandi
Angliya Premyer-ligasi yetakchilaridan biri boʻlgan «Manchester Siti» futbol klubi moliyaviy qoidalarni muntazam ravishda buzganlikda aybdor deb topildi. Endi «Siti»ni millionlab jarimalardan tortib, titullardan mahrum boʻlish va Ligadan chetlatilishgacha boʻlgan jiddiy jazo kutmoqda.
«Manchester Siti» moliyaviy qoidalarni misli koʻrilmagan darajada buzganlikda ayblandi
1880-yilda tashkil etilgan «Manchester Siti» Angliya Premyer-ligasining eng koʻp sovrin yutgan klublaridan biri boʻlib, uzoq vaqtdan beri eng boy jamoalardan ham sanaladi. 2008-yilda klub Shayx Mansur ibn Zoid Ol Nahayon boshchiligidagi Abu Dhabi United Group (BAA) investitsiya guruhi tomonidan xarid qilingan. Shundan buyon «Manchester Siti» sakkiz marta Premyer-liga, toʻrt marta Angliya kubogi, yetti marta Liga kubogi va bir marta UEFA Chempionlar ligasida gʻolib chiqqan.
Soʻnggi 10 yil davomida klubni ispaniyalik Xosep Gvardiola boshqardi. U 2025/26-yilgi mavsumda 1,92 million yevro oylik maosh bilan eng koʻp haq toʻlanadigan APL murabbiylari roʻyxatida birinchi oʻrinni egallagan. 2025/26-yilgi mavsum yakunida Gvardiola klubni tark etdi va uning yordamchisi boʻlib ishlagan italiyalik Enso Mareska bosh murabbiy etib tayinlandi. Transfermarkt maʼlumotlariga koʻra, 2026-yil yozidagi soʻnggi transfer oynasida «Manchester Siti» yangi futbolchilarni sotib olish uchun 526,2 million yevro sarflab, «Liverpul»ning 2025-yilda oʻrnatgan rekordini (483 million yevro) yangiladi.
29-sentabr kuni Angliya Premyer-ligasining mustaqil nazorat komissiyasi «Manchester Siti»ga oid tergovni yakunlab, oʻz qarorini eʼlon qildi: klub 2009-2018 yillar oraligʻida bir necha mavsum davomida APL moliyaviy qoidalarini muntazam ravishda buzganlikda aybdor deb topildi.
Klub «moliyaviy qoidalarga rioya qilayotgandek koʻrinish yaratish» uchun 900 million funt sterlingdan (taxminan 1,19 milliard dollar) ortiq soxta toʻlovlar amalga oshirganlikda fosh etildi. Komissiya hisob-kitoblariga koʻra, «Siti» daromadlarini 855,2 million funt sterlingga oshirib koʻrsatgan va xarajatlarini 66,2 million funtga kamaytirib koʻrsatgan, bu esa APL va UEFA belgilagan cheklovlarni jiddiy buzish hisoblanadi.
Natijada «Siti» notoʻgʻri moliyaviy hisobotlar taqdim etgan va haqiqiy holatni oʻz auditorlari hamda futbol regulyatorlaridan yashirgan, xususan, Premyer-liga qoidalarini chetlab oʻtish maqsadida.
Bundan tashqari, komissiya klub «APL tergovini toʻxtatish va barbod qilish uchun oʻzaro kelishilgan saʼy-harakatlarni amalga oshirgan» degan xulosaga keldi. 115 banddan iborat yakuniy ayblovlar roʻyxatidan faqat bittasi — tergov doirasida hamkorlik qilishdan bosh tortishga oid band — chiqarib tashlandi.