“Manchester Siti” “Chelsi” vingeriga “ko‘z tikdi”

“Manchester Siti” “Chelsi” vingeri Pedru Netuni sotib olishga qiziqish bildirmoqda, biroq London klubi 26 yoshli portugaliyalik futbolchi uchun belgilangan narxni tushirish niyatida emas. Bu esa transfer bo‘yicha muzokaralarni murakkablashtirishi mumkin.

Insayder Fabritsio Romanoning xabar berishicha, “Manchester Siti” Netu uchun “Chelsi” talab qilayotgan summadan sezilarli darajada kamroq mablag‘ taklif qilishni rejalashtirgan. “Ko‘klar” rahbariyati esa o‘z pozitsiyasida qat’iy turibdi va futbolchini arzon narxda sotishni istamayapti.

Agar transfer amalga oshsa, Netu “Manchester Siti”da Enso Mareska bilan yana birga ishlashi mumkin. Portugaliyalik futbolchi avvalroq “Chelsi”da italiyalik mutaxassis qo‘l ostida o‘ynagan. Uning London klubi bilan amaldagi shartnomasi 2031-yilning yoziga qadar mo‘ljallangan.

Transfermarkt Netuning bozor qiymatini 60 million yevroga baholamoqda. Shuningdek, futbolchiga “Arsenal”, “Liverpul” va “Tottenhem” tomonidan ham qiziqish bo‘lgani haqida xabarlar tarqalgan. Hozircha “Manchester Siti” va “Chelsi” o‘rtasida transfer bo‘yicha rasmiy kelishuv mavjud emas.