Maldiv orollarining aksariyat qismi 50 yilda yashash uchun yaroqsiz bo‘lib qoladi

Maldiv orollarining katta qismi 50 yil ichida yashash uchun yaroqsiz holga kelishi mumkin, chunki dengiz sathi ko‘tarilmoqda. Biroq, mahalliy aholi taslim bo‘lishni istamay, orolni saqlab qolish uchun marjon riflarini tiklamoqda. Bu haqda Euronews xabar berdi.

Olimlarning ma’lumotlariga ko‘ra, iqlim o‘zgarishi va dengiz sathining ko‘tarilishi tufayli 2070-yilga borib Maldiv orollarining taxminan 80 foizi suv ostida qolishi mumkin. Mutaxassislarning salbiy prognozlariga qaramay, mahalliy ekologik faollar va aholi o‘z uylarini tark etish niyatida emas. Ular Hindiston va Shri Lankaning janubida joylashgan orol davlatni saqlab qolish yo‘llarini izlamoqda.

Mintaqani saqlab qolish bo‘yicha asosiy loyihalardan birini eshkakli qayiqlarda (baydarka) suzib yuruvchi ko‘ngillilar amalga oshirmoqda. Ular orollar atrofida tabiiy himoya devorini hosil qiluvchi chidamli marjon turlarini ekmoqda va yetishtirmoqda. Sog‘lom marjon riflari to‘lqinlarni qaytaradi va qirg‘oq yemirilishini sekinlashtiradi, bu esa bo‘ronlar paytida quruqlikni yemirilishdan saqlaydi.

Tashabbus ishtirokchilarining ta’kidlashicha, motorli qayiqlardan emas, balki baydarkalardan foydalanish uglerod chiqindilarini kamaytiradi. Shuningdek, bu sayoz lagunalarni nozik dengiz ekotizimiga zarar yetkazmasdan ehtiyotkorlik bilan boshqarish imkonini beradi. Mahalliy aholi ekologiyani tiklash Maldivga kelajak uchun imkoniyat beradi deb hisoblaydi.

“Biz qanday ajdod bo‘lishimizni o‘zimiz hal qilamiz. Biz o‘z uyimizni, merosimizni hamda hali dunyoga kelmagan har bir maldivlik bolaning shu qirg‘oqlarda turish, dengizga qarash hamda bizga xos bo‘lgan xavfsizlik va hayratni his qilish huquqini himoya qilmoqdamiz”, deydi mahalliy rezidentlardan biri.

Avvalroq Maldiv orollarida 2007-yildan keyin tug‘ilganlarga sigaret chekish taqiqlangani haqida xabar berilgandi. Taqiq mamlakatga tashrif buyuradigan sayyohlarga ham tegishli.