Maktabga tayyorgarlik: bir bolaga qancha xarajat ketyapti?
Oʻzbekistonda yangi oʻquv yili boshlanishiga sanoqli kunlar qoldi. Ota-onalar esa farzandlari uchun kiyim-kechak, poyabzal, sumka va oʻquv qurollarini xarid qilmoqda. Xoʻsh, bu yil maktabga tayyorgarlik uchun qancha mablagʻ sarflanyapti? Kun.uz muxbiri koʻchada soʻrovnoma oʻtkazib, ota-onalardan farzandlarini yangi oʻquv yiliga tayyorlash uchun qancha xarajat qilayotganini soʻradi.
Maktabga tayyorgarlik xarajatlari: bir oʻquvchiga qancha mablagʻ sarflanmoqda?
Ota-onalar tomonidan bildirilgan narxlar har xil. Baʼzi oilalar barcha kerakli xaridlar uchun taxminan 800 ming soʻm sarflagan boʻlsa, boshqalarda bu miqdor 1,5 milliondan 2 million soʻmgacha yetmoqda.
Bir respondentning soʻzlariga koʻra, uning maktab formasi 600 ming soʻmga tushgan. Uning rubashkasi 110 ming, yubkasi 200 ming, sumkasi 130 ming, oyoq kiyimi esa 300 ming soʻm boʻlgan. Ikki farzandi uchun oʻquv qurollarining oʻzi 400 ming soʻmga tushgan.
Ayrim ota-onalar xarajatlarni kamaytirish maqsadida kiyimlarni oʻzlari tikishlarini yoki oʻtgan yildan qolgan kiyimlardan foydalanishlarini taʼkidladilar.
Bir nechta farzandi bor oilalarda esa xarajatlar sezilarli darajada yuqori. Soʻrovnomada uch nafar farzandi uchun kiyim-kechakka 3 million soʻmdan, kanselyariya tovarlariga esa 2,5 million soʻmdan ortiq sarflayotgan ota-ona ham uchradi.
Boshqa bir suhbatdoshning aytishicha, ikkita shim 600-700 ming soʻm, ikkita oq koʻylak yana 700 ming soʻm, ikkita krossovka esa 500 ming soʻm boʻlgan. Qolgan kanselyariya tovarlari bilan birga jami 2-2,5 million soʻm sarflangan.
Umuman olganda, soʻrovnoma natijalariga koʻra, bir nafar bola uchun maktabga tayyorgarlik xarajatlari 600 ming soʻmdan boshlanib, 2 million soʻm va undan ham yuqoriga koʻtarilishi maʼlum boʻldi.