Makron 15 yoshgacha bo‘lgan bolalar uchun ijtimoiy tarmoqlarni butun YeI bo‘ylab taqiqlashga chaqirdi
Emmanuel Makron Yevropa komissiyasi rahbari Ursula fon der Lyayenga maktub yo‘llab, bolalar ruhiy salomatligini himoyalash uchun butun YeI bo‘ylab 15 yoshgacha bo‘lganlarga ijtimoiy tarmoqlarni taqiqlashni taklif qildi. Avvalroq Fransiya Konstitutsiyaviy kengashi shu mazmundagi milliy qonun loyihasini bekor qilgandi.
Makron 15 yoshgacha bo‘lgan bolalar uchun ijtimoiy tarmoqlarni butun YeI bo‘ylab taqiqlashga chaqirdi
Fransiya prezidenti Emmanuel Makron Yevropa komissiyasini 15 yoshgacha bo‘lgan bolalar uchun ijtimoiy tarmoqlarni butun Yevropa Ittifoqi hududida taqiqlash tashabbusini qo‘llab-quvvatlashga undadi.
Yevropa komissiyasi prezidenti Ursula fon der Lyayenga 29-avgust sanasi bilan yuborilgan maktubida Makron yangi YeI qonunchiligi orqali ittifoq miqyosida taqiq joriy etish endi kechiktirib bo‘lmaydigan masalaga aylanganini yozgan.
Bunga yozda Fransiya Konstitutsiyaviy kengashi sentabr oyida kuchga kirishi kerak bo‘lgan milliy qonun loyihasini bekor qilgani sabab bo‘ldi. Iyul oyida Fransiya parlamenti 15 yoshdan kichik bolalar uchun ijtimoiy tarmoqlardan foydalanishni taqiqlovchi qonunni ma’qullagan va mamlakat YeIda bunday cheklovni qabul qilgan birinchi davlat bo‘lgandi.
“Ittifoq hududidagi barcha bolalarni himoya qilish uchun bu borada yanada qat’iy qadam tashlash va Yevropaning yangi qonun hujjati orqali 15 yoshgacha bo‘lgan bolalarning ijtimoiy media platformalariga kirishini cheklash bo‘yicha yagona tartibni yo‘lga qo‘yish zarur bo‘lib qoldi deb hisoblayman”, — deb yozgan Makron.
O‘tgan yili Avstraliyada bolalar uchun ijtimoiy tarmoqlarni taqiqlash bo‘yicha muhim qaror qabul qilingani ortidan, ijtimoiy tarmoqlarning yoshlar ruhiy salomatligi va xavfsizligiga ta’siri borasidagi xavotirlar kuchaygani sabab Yevropaning bir qator davlatlari ham o‘z cheklovlarini joriy etishni ko‘rib chiqmoqda. Biroq ayrim davlatlar, ayniqsa Skandinaviya mamlakatlari, buni ota-onalarning ixtiyoriga qoldirish ma’qulroq deb hisoblaydi.
Hozirda Fransiya prezidenti sifatidagi vakolat muddatining so‘nggi yilini o‘tayotgan Makron 2027-yilda bo‘lib o‘tadigan navbatdagi prezidentlik saylovlari oldidan bu masalani ustuvor vazifa sifatida belgilagan. Uning aytishicha, Fransiya Konstitutsiyaviy kengash tomonidan bekor qilingan qonun loyihasini alohida qayta ishlab chiqadi, biroq parlamentdagi siyosiy tarqoqlik va murakkab budjet muzokaralari yangi qonunni qabul qilish jarayonini qiyinlashtirishi mumkin.
Fon der Lyayen iyul oyida ikki ekspert taklif qilgan ko‘p bosqichli tizim tavsiyalariga tayangan holda, Yevropa Ittifoqi 27 ta a’zo mamlakat hududida kichik yoshdagi bolalarning ijtimoiy tarmoqlardan foydalanishini cheklash yo‘lida qadam tashlashini bildirgandi. Ushbu yondashuvga ko‘ra, 13 yoshga to‘lmagan bolalarga faqat cheklangan va nazorat ostidagi ruxsat beriladi, yosh ulg‘aygan sari cheklovlar bosqichma-bosqich yumshatib boriladi.