Litva Markaziy Osiyo davlatlari fuqarolaridan ishga joylashish uchun arizalarni qabul qilishni vaqtincha toʻxtatdi
Litva Markaziy Osiyo davlatlari fuqarolaridan ishga joylashish boʻyicha arizalarni qabul qilishni vaqtincha toʻxtatdi
Markaziy Osiyo davlatlaridan Litvaga kelayotgan ishchilar soni ortib borayotgani fonida, mamlakat Migratsiya departamenti ushbu mintaqadagi tashqi xizmat koʻrsatish markazlari faoliyatini vaqtincha toʻxtatdi. Litvaga kirish va ishga joylashish uchun arizalar aynan shu markazlar orqali topshirilar edi. Bu haqda departament rahbari Indre Gaspere maʼlum qildi.
Uning soʻzlariga koʻra, soʻnggi yillarda Markaziy Osiyodan kelayotganlar oqimi sezilarli darajada oshgan. Ishga joylashish boʻyicha arizalar soni koʻpligi sababli, rasmiylar tashqi markazlar faoliyatini toʻxtatish va yangi arizalarni qabul qilishni tugatishga qaror qilishdi.
«Ham ish beruvchilar, ham ishga joylashishni xohlovchi chet elliklarning umidlarini inobatga olgan holda, tashqi markazlar faoliyati toʻxtatildi va arizalar boshqa qabul qilinmaydi», — deya Gasperening soʻzlaridan iqtibos keltiradi BNS.
Migratsiya departamenti maʼlumotlariga koʻra, 1 sentyabr holatiga koʻra, deyarli 227 ming chet ellik Litvada yashash uchun amaldagi ruxsatnomaga ega boʻlgan. Ulardan qariyb 80 ming nafari Ukraina, deyarli 48 ming nafari Belarus, 13 ming nafardan Rossiya va Oʻzbekiston fuqarolari boʻlgan. Bundan tashqari, mamlakatda 9,4 ming Hindiston va 7,4 ming Tojikiston fuqarosi boʻlgan.
Litva bundan oldin ham mintaqa mamlakatlaridan hujjatlarni qabul qilishni cheklagan edi. 2025 yil 22 oktyabrdan boshlab Dushanbedagi tashqi xizmat koʻrsatish markazida hujjatlarni qabul qilish toʻxtatilgan edi. Litva Migratsiya departamenti oʻshanda buni ish beruvchilarning ehtiyojlari qayta koʻrib chiqilgani va vakolatli davlat organlarining xulosalari bilan izohlagan edi.