Lindsi Klensining advokati sudyadan hakamlar hayʼati aʼzosini tekshirishni va uning telefonini tekshirishni soʻramoqda

Lindsi Klensining advokati sudyadan hakamlar hayʼati aʼzosini tekshirishni va uning telefonini koʻrib chiqishni soʻramoqda

Lindsi Klensining advokati Kevin Reddington sudyani sud jarayonini haqiqiy emas deb topmaslikka koʻndirish uchun koʻplab harakatlarni amalga oshirdi.

Uch nafar farzandini oʻldirishda ayblanayotgan massachusetslik onaning himoyachisi sudyadan ish boʻyicha hakamlar hayʼati aʼzolaridan birini tekshirishni soʻradi.

Lindsi Klensiga qarshi ish shu oyda hakamlar hayʼati bir ovozdan qarorga kela olmaganidan keyin muvaffaqiyatsizlik va adovat bilan yakunlandi.

Uning advokati Kevin Reddington suddan «Anonim hakam»ning muhokamalar paytida mobil telefondan foydalanganini, shuningdek, u toʻldirgan soʻrovnomani tekshirishni talab qilmoqda.

Klensini aybdor deb topmoqchi boʻlgan yagona hakam Maykl Desronvilning advokati himoya tomonining soʻnggi arizasini oʻz fuqarolik burchini bajargani uchun uning mijoziga qilingan «aqldan ozganlarcha» (Looney Tunes) hujum deb atadi. Desronvil «u [Klensi] nima qilayotganini juda yaxshi bilganiga yetarlicha dalillar bor edi» deb aytgan.

Hakamlar hayʼati raisi OAVga bergan intervyusida Desronvil Klensining aybdorligiga nisbatan asosli shubha bildirganini, bu esa undan ayolni aybsiz deb topishni talab qilishini aytgan edi. U buni inkor etmoqda.

Klensi oilaning Massachusetsdagi uyida uch farzandi — besh yoshli Kora, uch yoshli Douson va sakkiz oylik Kallanni oʻldirganini inkor etmagan.

Uning advokatlari ayolning ruhiy kasalligi sababli aybdor emasligini taʼkidlab, oʻsha paytda u tugʻruqdan keyingi psixozdan aziyat chekkanini aytishgan.

Prokurorlarning taʼkidlashicha, Klensi bolalarini boʻgʻib oʻldirish uchun erini uydan yumush bilan ataylab chiqarib yuborishga qaror qilgan.

Juma kuni topshirilgan arizasida Reddington suddan «Anonim hakam» hakamlar hayʼati muhokama qilgan har bir kuni mahalliy vaqt bilan soat 08:00 dan 16:30 gacha amalga oshirgan qoʻngʻiroqlari va matnli xabarlarini koʻrib chiqishni soʻradi.

U shuningdek, suddan hakamlarni tanlash jarayonida ushbu hakam bergan javoblarning, shuningdek, uning boʻlajak hakamlar uchun soʻrovnomadagi javoblarining toʻgʻriligini baholashni soʻradi.

Alohida arizada Reddington Klensiga qarshi ishni tugatishni ham soʻragan. Prokurorlar uni qayta sudlashlari yoki yoʻqligini hali maʼlum qilishmadi.

Klensini oqlashdan bosh tortgani uchun noroziliklarga duch kelgan Desronvil oʻzini himoya qilish uchun advokat yolladi.

Advokat Edvard Paltzik X ijtimoiy tarmogʻidagi bayonotida himoya tomonining bu «jirkanch» arizasi AQShning adolatli sudlovga boʻlgan konstitutsiyaviy huquqiga hujum ekanini aytdi.

«Agar advokat bilan kelishmagani uchun hakamlar shafqatsiz taʼqiblarga uchrashi yangi normaga aylansa, Oltinchi tuzatish bilan xayrlashavering», deb yozdi u.

Sud tugaganidan keyin bir nechta hakamlar yakunda Klensini jinoiy javobgarlikka tortib boʻlmaydi deb topish foydasiga 11 ga 1 nisbatda boʻlinishganini aytishdi.

Desronvil oʻtgan hafta uning aybdorligiga shubhasi yoʻqligini aytdi.

«Muhokama paytida men turli ehtimoliy nazariyalarni tushuntirishga harakat qilganimda, goʻyo taqdim etilgan dalillarga asoslanib shubhalanayotgandek, gapimni boʻlaverishdi», dedi u BBC’ning AQShdagi hamkori CBS News telekanaliga bergan bayonotida.

Hakamlar hayʼati raisi, nafaqadagi beshinchi sinf oʻqituvchisi NBC telekanaliga bergan intervyusida Desronvil oʻzida asosli shubha borligini tan olganini, biroq Klensini ruhiy kasalligi sababli aybsiz deb topishdan bosh tortganini aytdi.