Kurer bilan janjaldan keyin Toshkentda restoranning piyodalar yoʻlagidagi maydonchasi olib tashlandi

Kurer bilan yuzaga kelgan mojaro ortidan Toshkentda restoranning piyodalar yoʻlagidagi maydonchasi olib tashlandi

Toshkent shahar IIBB bergan maʼlumotga koʻra, hodisa 17-oktabr kuni taxminan soat 13:00 da yuz bergan. Restoran oldida 1990-yilda tugʻilgan S.R. bilan 2009-yilda tugʻilgan voyaga yetmagan yigit oʻrtasida kelishmovchilik kelib chiqqan.

OAV xabarlarida yigit kurer sifatida ishlashi, tortishuv esa Markaziy univermag - TSUM yaqinidagi piyodalar yoʻlagidan skuterda oʻtish chogʻida boshlanganini aytilgan. Tarqalgan videoda restoran vakili uni toʻxtatib, haqorat qilgani va urish bilan qoʻrqitgani aks etgan. Kurer esa navigator koʻrsatgan yoʻnalish boʻyicha kelganini bildirgan.

IIBB fuqaroning xatti-harakatlarida jamoat tartibini buzish holati mavjud boʻlganini maʼlum qilgan. Mirobod tumani IIO FMB tomonidan Maʼmuriy javobgarlik toʻgʻrisidagi kodeksning 183-moddasi — «Mayda bezorilik» bo‘yicha bayonnoma tuzilib, yigʻilgan hujjatlar jinoyat ishlari boʻyicha tuman sudiga yuborilgan.

Voqeadan soʻng «Moviy gumbazlar» xiyobonidagi yozgi maydoncha joylashuvi ham tekshirilgan. Hokimlik maʼlumotiga koʻra, hududdan foydalanish talablari, jumladan, piyodalarning erkin harakatlanishiga oid qoidabuzarliklar aniqlangan. Shundan keyin choralar koʻrilib, yoʻlak restoran stol-stullaridan boʻshatilgan.

Restoran maʼmuriyati oʻz munosabatida yozgi maydoncha yonidagi yoʻlak piyodalar, bolalar aravachasi bilan yuruvchilar va harakatlanish imkoniyati cheklangan shaxslar uchun ochiqligini bildirgan. Shu bilan birga, xodimlar yoʻlakda mototsikl va mopedlarda harakatlanmaslikni soʻrashini qayd etgan.

Restoran janjal holatlarini va kuzatuv kameralari yozuvlarini oʻrganayotganini, xodimlarning qoʻpolligi hamda tahdidlariga yoʻl qoʻymasligini ham maʼlum qilgan.

Keyinroq janjalda qatnashgan shaxs kurerdan uzr soʻrab, qilgan ishidan pushaymonligini bildirgan.