Kubada navbatdagi yirik elektr uzilishi yuz berishi oqibatida millionlab odamlar chiroqsiz qoldi
AQSh blokadasi tufayli yanada kuchaygan yoqilgʻi taqchilligi sababli elektr energiyasidagi keng koʻlamli uzilishlar tobora odatiy holga aylanib bormoqda.
Juma kuni Kubada millionlab odamlar elektr energiyasiz qoldi, chunki mamlakat yana bir yirik tizimli oʻchish girdobiga uchradi.
Kuba energetika vazirligining maʼlum qilishicha, mamlakatning butun elektr tarmogʻi «toʻliq uzilish»ga uchragan va bu butun mamlakat boʻylab elektr taʼminotining toʻxtashiga olib kelgan.
Kechqurunga kelib, poytaxt Gavanadagi shifoxonalar va suv nasos stantsiyalari yaqinidagi hududlarni oʻz ichiga olgan baʼzi ustuvor yoʻnalishlarda elektr taʼminoti tiklandi, deb xabar berdi UNE tarmoq operatori.
Bu joriy yilda Kubada sodir boʻlgan kamida oltinchi qisman yoki toʻliq elektr oʻchishidir, chunki eskirgan elektr infratuzilmasi va doimiy yoqilgʻi taqchilligi AQShning kommunistik davlatga neft yetkazib berishga qoʻygan blokadasi tufayli yanada kuchaygan.
UNE maʼlumotlariga koʻra, elektr taʼminotidagi uzilish juma kuni mahalliy vaqt bilan soat 14:00 dan sal oldin (Grinvich boʻyicha 18:00) uzatishdagi nosozlik va Kuba markazidagi noqulay ob-havo sharoiti tufayli boshlangan.
Operatorning milliy yuklamani taqsimlash direktori Feliks Estradaning aytishicha, elektr energiyasini «bosqichma-bosqich tiklash» protokollari ishga tushirilgan va bu jarayon shanba kuni ham davom etgan.
Kuba yoqilgʻi importiga juda qaram, shu bolam yil boshidan beri AQShning qatʼiy sanktsiyalari va neft blokadasi mavjud taqchillikni yanada chuqurlashtirdi.
Oziq-ovqat va dori-darmonlar ham tanqis boʻlib qoldi, shifoxonalar normal ishlashga qiynalmoqda, maktablar va davlat idoralari yopilishga majbur boʻldi.
«Oxirgi paytlarda bu odatga aylanib bormoqda», dedi Gavanada yashovchi Frank Lorenso juma kuni Reuters axborot agentligiga.
«Ilgari bu kamroq sodir boʻlardi — oyiga bir marta... kechagina 24 soat davomida elektrsiz qoldik, ular uni atigi bir soatga yoqishdi va u yana oʻchdi».
«Bu birin-ketin sodir boʻlmoqda: suv yoʻq, ovqat pishirish uchun gaz yoʻq, elektr yoʻq», dedi 36 yoshli maktab oʻqituvchisi Lidiya Fernandes AFP axborot agentligiga. «Toʻgʻrisi, qanday qilib jinni boʻlib qolmaganimizga hayronman».
78 yoshli Fransisko Rodriges juma kuni uning uyida 28 soatdan beri elektr energiyasi yoʻqligini va «bir necha kun davomida» chiroq boʻlmasligidan qoʻrqayotganini aytdi.
Takroriy elektr oʻchishlari Kubada kamdan-kam uchraydigan norozilik namoyishlariga olib keldi, bu yerda ruxsat etilmagan namoyishlar noqonuniy hisoblanadi va taqiqni buzganlar qamoq jazosiga mahkum etilishi mumkin.
Gavana yoqilgʻi inqirozida Tramp maʼmuriyatini aybladi va uning barcha sanktsiyalarini, jumladan, avgust oyida eʼlon qilingan yangi bosqichni qoraladi — bu choralar Karib havzasi oroli rahbariyatiga qarshi keng koʻlamli bosim kampaniyasining bir qismidir.
Kubaning mintaqaviy ittifoqchisi Venesuela kuniga taxminan 35 000 barrel neft yetkazib bergan deb ishoniladi — bu Kuba neft ehtiyojining yarmiga yaqinini tashkil qiladi — toki yanvar oyida AQSh Venesuela prezidenti Nikolas Maduroni hibsga olganidan keyin Venesuelaning oʻz yetkazib berishi toʻxtatilgunga qadar.
AQSh Prezidenti Donald Tramp Gavanaga neft joʻnatayotgan mamlakatlarga boj joriy etish bilan tahdid qildi va AQSh shu kabi bir qator joʻnatmalarni musodara qildi.
Vashington esa Kubadagi energetika inqirozi ichki boshqaruvning yomonligi natijasi ekanligini aytmoqda va uni «milliy xavfsizlikka tahdid solish»da ayblamoqda. Tramp uning rahbariyatini hokimiyatdan chetlatishni ochiqchasiga muhokama qildi, jumladan, shu yilning mart oyida «doʻstona egallab olish» bilan tahdid qildi.