Krishtianu Ronaldu o‘g‘li ilk bor Portugaliya U-17 terma jamoasidan chaqiruv oldi
Portugaliya o‘smirlar terma jamoasining o‘quv-mashg‘ulot yig‘ini 6–17-noyabr kunlari bo‘lib o‘tadi.
Krishtianu Ronaldu o‘g‘li Portugaliya U-17 terma jamoasidan ilk chaqiruvni oldi
Besh karra “Oltin to‘p” sohibi Krishtianu Ronalduning to‘ng‘ich farzandi Krishtianu Junior ilk marta Portugaliya U-17 terma jamoasi tarkibiga kiritildi. U 2027-yilgi Yevropa chempionati saralashining birinchi bosqichida qatnashadigan futbolchilar ro‘yxatidan o‘rin oldi.
Portugaliya o‘smirlar terma jamoasining o‘quv-mashg‘ulot yig‘ini 6–17-noyabr kunlari o‘tkaziladi. Saralashning birinchi bosqichida portugaliyalik futbolchilar Andorra, Bolgariya va Serbiya terma jamoalariga qarshi maydonga tushadi.
Avvalroq OAVda kichik Krishtianu Ronalduning o‘smirlar terma jamoasiga chaqirilmagani uning otasi sentyabr oyi oxirida Portugaliya milliy terma jamoasi yig‘inini tark etishiga sabab bo‘lgan omillardan biri ekani haqida xabarlar tarqalgan edi.
Ma’lumot uchun, Krishtianu Junior 2010-yil iyun oyida tug‘ilgan. U Saudiya Arabistonining “An-Nassr” klubi yoshlar jamoasida hujumchi sifatida o‘ynaydi. Klubning asosiy jamoasida esa uning 41 yoshli otasi Krishtianu Ronaldu to‘p suradi.