Komil Allamjonov “Doʻstlik” ordeni bilan taqdirlandi

Komil Allamjonov "Doʻstlik" ordeni bilan taqdirlandi. Prezident administratsiyasi rahbarining shartnoma asosidagi maslahatchisi Komil Allamjonov Prezident farmoniga binoan "Doʻstlik" ordeni bilan mukofotlandi.

Maʼlumki, soʻnggi paytlarda Allamjonov Oʻzbekiston va AQSH oʻrtasidagi munosabatlarni yangi bosqichga koʻtarishga katta hissa qoʻshib kelmoqda. Bu davrda rasmiy Toshkent va Vashington oʻrtasidagi hamkorlik aloqalari sezilarli darajada faollashdi. Ikki davlat prezidentlari oxirgi bir yil ichida toʻrt marta yuzma-yuz uchrashdilar va bir necha bor telefon orqali muloqot qildilar.

AQSH-Oʻzbekiston ishbilarmonlik va investitsiya kengashi tashkil etilib, iqtisodiy hamkorlikning institutsional asosi mustahkamlandi. Oʻtgan yili Vashingtonda bir necha bor, joriy yilda esa Toshkent xalqaro investitsiya forumi doirasida Prezident Shavkat Mirziyoyevning AQSH yetakchi kompaniyalari delegatsiyalari bilan uchrashuvlari tashkil etildi.

AQSH sarmoyadorlari Oʻzbekistonga faol jalb etilishi bilan birga, oʻzbekistonlik ishbilarmonlarning AQSHda biznes yuritishi ham osonlashtirildi. Xususan, 2026-yil 1-yanvardan boshlab Oʻzbekiston rezidentlari uchun AQSHda kompaniya tashkil etish yoki Amerika kompaniyalari aksiyalarini sotib olish maqsadida AQSHga pul yuborishda hukumat ruxsatini olish talabi bekor qilindi.

Bu erkinlik ortidan, Oʻzbekiston Markaziy banki maʼlumotiga koʻra, joriy yilning birinchi choragida Oʻzbekiston rezidentlari xorijiy aktivlarga 153 million dollar toʻgʻridan-toʻgʻri investitsiya kiritdi. Bu bir yil avvalgi koʻrsatkichdan 33 barobarga koʻpdir.

Shuni taʼkidlash lozimki, Komil Allamjonov Jorj Vashington universitetining Markaziy Osiyo dasturi boʻyicha maxsus maslahatchisi ham hisoblanadi.