Kogonda giyohvand moddalar sabab ikki shaxsga hukm o‘qildi
Qayd etilishicha, Kogon shahrida tezkor tadbir o‘tkazilgan. Unda nazorat ostidagi xarid uchun 5 million so‘m
Kogonda giyohvand moddalar bilan bog‘liq jinoyat ishi bo‘yicha ikki shaxsga hukm o‘qildi. Bu haqda Buxoro viloyati sudi axborot xizmati rahbari Feruz Sharopov «Xabar.uz»ga ma’lum qildi. Uning ta’kidlashicha, sudlanganlarning ikkalasi ham ilgari sudlanmagan.
Sud hujjatlariga ko‘ra, jinoyat ishlari bo‘yicha Kogon shahar sudi 31 yoshli Sunnat Yarashev va 21 yoshli Vali Samiyevga nisbatan jinoyat ishini ko‘rib chiqqan.
Qayd etilishicha, Kogon shahrida o‘tkazilgan tezkor tadbir davomida nazorat ostidagi xarid uchun 5 million so‘m pul berilgan. Yuqorida ismi-sharifi (o‘zgartirilgan) keltirilgan shaxslar oldindan til biriktirib, ushbu pul evaziga 14,40 gramm «gashish» giyohvandlik vositasini sotishga uringan.
Samiyevning suddagi ko‘rsatmasiga ko‘ra, u Yarashevdan olgan 5 million so‘m qarzi evaziga giyohvandlik vositasini garov sifatida qoldirgan. Keyinchalik qarzining bir qismini qaytarib, ushbu moddani olib ketgan. U nazorat ostidagi xarid jarayonida «Amir» taxallusli shaxsdan 5 million so‘m olgan va yana Yarashevning uyiga borgan.
Yarashev esa o‘z aybiga iqror bo‘lmagan. U Samiyevdan qarz olgani, giyohvandlik vositasini garov sifatida qoldirgani va keyinchalik qarzini qaytarib, uni olib ketganini aytgan. Sud esa bu vajlarni javobgarlikdan qutilish maqsadida bildirilgan, deb baholagan.
Sudda so‘roq qilingan guvohlar va ish hujjatlariga ko‘ra, Samiyevdan giyohvandlik vositasiga o‘xshash modda hamda nazorat tadbirida ishlatilgan pullarning bir qismi olingan. Shundan so‘ng huquqni muhofaza qiluvchi organlar Yarashevning Buxoro shahridagi yashash manzilini ko‘zdan kechirgan.
Ko‘zdan kechirish jarayonida uydan giyohvandlik vositasiga o‘xshash moddalar, 4,3 million so‘m pul, maxsus idishlar va to‘rt dona gultuvak topilgan. Ekspertiza xulosalariga ko‘ra, ish bo‘yicha olingan moddalar «gashish» ekani va ularning tegishli miqdorlari tasdiqlangan.
Kogon shahar sudi raisi Akram Rahimovning so‘zlariga ko‘ra, «Sud Yarashevga qo‘yilgan Jinoyat kodeksining tegishli moddalari bo‘yicha ayblovni isbotlanmagan, deb topdi. Tergovda gultuvaklardagi o‘simliklar taqiqlangan kannabis ekani haqida ekspertiza o‘tkazilmagani va o‘simlik turi aniqlanmagani sud tomonidan inobatga olindi. Sud Konstitutsiya va Jinoyat-protsessual talablariga tayanadi. Aybdorlikka oid barcha shubhalar sudlanuvchi foydasiga hal qilinishi lozimligini inobatga oldi. Shu asosda Yarashev mazkur holat bo‘yicha aybsiz, deb topildi va ishning shu qismi tugatildi».
Biroq, sud Yarashevni giyohvandlik vositasini o‘tkazish maqsadida saqlash bilan bog‘liq jinoyatlarda aybdor, deb topgan. Unga 6 yil ozodlikdan mahrum qilish jazosi tayinlangan. Jazolarni qisman qo‘shish orqali unga uzil-kesil 8 yil ozodlikdan mahrum qilish jazosi belgilangan.
Samiyevga esa uning yoshi va aybiga to‘liq iqrorligi inobatga olinib, 6 yil ozodlikdan mahrum qilish jazosi belgilangan.
Har ikki sudlanuvchi jazoni umumiy tartibli koloniyada o‘taydigan bo‘ldi.