Kobuldagi xususiy maktabda portlash yuz berdi (video)
Kobulda xususiy maktabda portlash sodir bo‘ldi: bolalar jarohatlandi
Afg‘oniston poytaxti Kobulning g‘arbiy qismida joylashgan xususiy maktabda 17-avgust kuni portlash yuz berdi. Tibbiyot manbalarining xabar berishicha, hodisa o‘quvchilar darsdan chiqayotgan vaqtda sodir bo‘lgan va bir nechta o‘quvchi, asosan, bolalar jarohatlangan. Bu haqda Kabul Now nashri ma’lum qildi.
Manbalarga ko‘ra, voqea mahalliy vaqt bilan soat 16:30 atrofida Kobulning 13-hududidagi Dashti Barchi tumanida joylashgan “Shamsi Hidoyat” xususiy maktabida ro‘y bergan.
Kabul Now nashriga tibbiyot manbasining ma’lum qilishicha, o‘quvchilar darsdan chiqqanida maktab qarshisidagi ko‘chadan bino hovlisiga granata uloqtirilgan. Manba portlash oqibatida talafotlar borligini tasdiqlagan, ammo aniq soni oshkor etilmagan. Jabrlanganlarning aksariyati yosh bolalar bo‘lib, ular orasida ham o‘g‘il, ham qiz bolalar bor.
Bir nechta yaralangan o‘quvchilar shifoxonalarga yetkazilgan. Ularning jarohat darajasi haqida hozircha ma’lumot yo‘q. Nashr qo‘lga kiritgan videotasvirlarda tez yordam mashinalari voqea joyida turgani va jarohatlanganlarni olib ketayotgani aks etgan.
Hozircha hech bir guruh portlash uchun javobgarlikni o‘z zimmasiga olmadi. “Tolibon” rasmiylari ham holat bo‘yicha izoh bermadi. Hodisa sodir bo‘lgan Dashti Barchi hududida asosan afg‘onistonlik shia-hazoralar jamoasi istiqomat qiladi. Bu hudud bir necha bor jangari guruhlar, ayniqsa, ISHID (ISHID-Xuroson) tomonidan nishonga olingan.
ISHID so‘nggi yillarda Kobul va Afg‘onistonning boshqa hududlarida tinch aholi vakillari bo‘lgan hazoralarga qarshi bir qator qonli hujumlarni amalga oshirgan. Tashkilot shu paytgacha maktablar, shifoxonalar, jamoat transporti, masjidlar va sport zallarini nishonga olib keladi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Avvalroq BMT mamlakatdagi hukumat besh yilligi munosabati bilan hisobot e’lon qilib, “Tolibon” Afg‘onistonda terrorchilik xavfini jilovlay olmagani haqida ma’lum qilgandi. Unda, xususan, ISHID-Xuroson mamlakatda o‘z kuchini qayta tiklayotgani aytiladi.