Kiyevdagi bolalar shifoxonasiga zarba berishda ayblangan rossiyalik general otib ketildi
Kiyevdagi bolalar shifoxonasiga zarba berishda ayblangan rossiyalik general otib ketildi
Rossiyaning Saratov viloyatida Kiyevdagi “Oxmatdet” bolalar shifoxonasiga raketa zarbasini tashkil etishda ayblangan general-mayor Nikolay Varpaxovich otib ketildi.
Voqea 3-sentyabr kuni ertalab Engels tumanidagi Probujdeniye qishlog‘ida yuz bergan. Noma’lum shaxs motosiklda kelib, do‘kondan chiqayotgan Varpaxovichga yaqin masofadan ikki marta o‘q uzgan va keyin voqea joyidan qochgan. O‘qlardan biri uning yuziga, ikkinchisi tanasiga tekkan.
General og‘ir ahvolda shifoxonaga yotqizilgan, keyinroq esa davolanish uchun Moskvaga olib ketilgan. Rossiya rasmiylari yaralangan harbiyning shaxsini hozircha oshkor qilmagan.
Shunga qaramay, harbiy Telegram kanallari uni Rossiya uzoq masofali aviatsiyasi tarkibidagi 22-og‘ir bombardimonchi aviatsiya diviziyasi qo‘mondoni Nikolay Varpaxovich deb atagan. ASTRA ma’lumotiga ko‘ra, Probujdeniye qishlog‘i Varpaxovichning ro‘yxatdan o‘tgan manzillaridan biri hisoblanadi.
Engels shahri Moskvadan qariyb 850 kilometr uzoqlikda joylashgan. Bu yerda Rossiyaning asosiy strategik aviatsiya obyektlaridan biri — Engels-2 aviabazasi mavjud.
Ukraina xavfsizlik xizmati Varpaxovichga 2024-yil 8-iyulda Kiyevdagi “Oxmatdet” bolalar shifoxonasiga raketa zarbasi berish bilan bog‘liq ish bo‘yicha sirtdan ayblov qo‘ygan. Ukraina tergoviga ko‘ra, u hujumga buyruq bergan, zarbada X-101 qanotli raketasi ishlatilgan.
Hujum oqibatida ikki kishi halok bo‘lgan, 30 dan ortiq odam, jumladan, to‘qqiz nafar bola jarohatlangan. Ukraina Sog‘liqni saqlash vazirligi ma’lumotiga ko‘ra, zarba paytida shifoxonada 627 nafar bola davolanayotgan edi.
Ukraina xavfsizlik xizmati 31-avgust kuni Varpaxovich bilan birga yana bir rossiyalik harbiy — 49-qo‘shma qo‘shin armiyasi raketa brigadasi qo‘mondoni polkovnik Aleksandr Lutovinovga qarshi ham dalillar to‘planganini ma’lum qilgan. Ukraina tomoni uni 2024-yil 24-avgustda Kramatorskdagi Sapphire mehmonxonasiga raketa zarbasini tashkil etishda ayblaydi. O‘sha hujumda Reuters xavfsizlik bo‘yicha maslahatchisi halok bo‘lgan, besh nafar jurnalist jarohatlangan.