Kiyevda namoyishchilar Zelenskiyga petitsiya topshirdi
Ukraina poytaxti Kiyevda va mamlakatning boshqa qator shaharlarida yuzlab odam sobiq mudofaa vaziri Mixail Fedorovni lavozimiga qaytarish talabi bilan yana ko‘chalarga chiqdi. Namoyishchilar prezident Volodimir Zelenskiyning so‘nggi kadrlar bo‘yicha qarorlarini ham tanqid qildi.
**Kiyevda namoyishchilar Zelenskiyga petitsiya taqdim etdi**
16-avgust, yakshanba kuni Kiyevda Mixail Fedorovni Ukraina mudofaa vaziri lavozimiga qaytarishni talab qilgan ommaviy norozilik namoyishlari davom etdi. Ukraina OAV xabariga ko‘ra, bu kabi aksiyalar ketma-ket 32 kundan beri o‘tkazilmoqda.
"Interfaks-Ukraina" agentligi ushbu tadbirni "mudofaa sohasida muloqot va islohotlarni qo‘llab-quvvatlash aksiyasi" deb atadi.
Namoyishchilar dastlab Kiyev markazidagi Ukraina xalqi Ozodlik arkasi oldida to‘planishdi. So‘ngra ular Xreshchatik, Osmon yuzligi qahramonlari xiyoboni va Olginskaya ko‘chasi bo‘ylab yurish uyushtirishdi. Aksiya yakunida prezident ofisi binosi yaqinidagi Ivan Franko maydonida miting tashkil etildi.
Oboz.ua nashrining ma’lumotlariga ko‘ra, namoyishchilar kolonnasi poytaxtning markaziy ko‘chalari bo‘ylab yuzlab metrga cho‘zilgan. Jurnalistlarning qayd etishicha, aksiyada turli yoshdagi fuqarolar ishtirok etgan bo‘lsa-da, ular orasida yoshlar ko‘pchilikni tashkil etgan.
Namoyishchilarning asosiy talabi – Mixail Fedorovni Ukraina mudofaa vaziri lavozimiga qaytarish. Shu bilan birga, aksiya ishtirokchilari prezident Volodimir Zelenskiyning boshqa so‘nggi kadrlar bo‘yicha qarorlariga ham norozilik bildirishdi. Xususan, ular sobiq mudofaa vaziri Rustem Umerovning Ukraina Tashqi razvedka xizmati rahbari etib tayinlanishi hamda Mikolayiv viloyati harbiy ma’muriyatining sobiq rahbari Vitaliy Kimning Ukraina faxriylar ishlari vaziri lavozimiga tayinlanishini tanqid qilishdi.
Namoyishlarda Fedorovni qo‘llab-quvvatlovchi, hukumatni jamiyat bilan ochiq muloqot qilishga va mamlakatning Yevropa yo‘nalishini davom ettirishga chaqiruvchi shiorlar yangradi.
Ukrainaning NV nashri ma’lumotlariga ko‘ra, shunga o‘xshash aksiyalar faqat Kiyev bilan cheklanib qolmagan. Fedorovni qo‘llab-quvvatlash namoyishlari Lviv, Dnipro, Lutsk, Rovno, Poltava, Odessa, Vinnitsa, Xmelnitskiy va Chernovsi shaharlarida ham o‘tkazilgan.
Kiyevda esa aksiya ishtirokchilari prezident ofisi vakiliga Volodimir Zelenskiy nomiga tayyorlangan petitsiyani topshirishdi. Ukraina OAV ma’lumotlariga ko‘ra, hujjatda Mixail Fedorov mudofaa vaziri bo‘lgan davrda boshlangan islohotlarni davom ettirish hamda mamlakat rahbariyatini jamiyat bilan kengroq muloqot o‘rnatishga chaqirish talablari o‘rin olgan.
"Ukrainskaya pravda" xabar berishicha, namoyish tashabbuskorlaridan biri, urush faxriysi Dmitriy Kozyatinskiy aksiyada so‘zga chiqib, Ukrainada hanuz mudofaa va tashqi ishlar vazirlari tayinlanmaganiga e’tibor qaratgan.