Kiyev yaqinida omborlar yonmoqda: portlashlar kuzatilmoqda
Kiyev viloyatining Bucha tumanida Rossiya qoʻshinlari hujumidan keyin ombor binolarida yongʻin boshlanib, portlashlar sodir boʻlmoqda. Hodisa oqibatida Kiyev–Chop avtomobil yoʻlining bir qismida transport harakati vaqtincha toʻxtatildi. Jabrlanganlar va vayronagarchilik koʻlamiga oid maʼlumotlar aniqlashtirilmoqda.
Kiyev yaqinidagi Bucha tumanida 28-avgust oqshomida omborlarda yongʻin boshlanib, portlashlar bilan davom etmoqda. Bu hodisa Rossiya hujumi natijasida yuzaga kelgan.
Voqea joyida favqulodda xizmatlar faoliyat olib bormoqda. Qutqaruvchilar hujum oqibatlarini bartaraf etish va yongʻinni nazoratga olishga urinmoqda.
Tkachenko mahalliy aholini hodisa joyiga yaqinlashmaslikka va favqulodda xizmatlar koʻrsatmalariga amal qilishga chaqirdi.
Hozircha hujum natijasida jabrlanganlar bor-yoʻqligi va yetkazilgan zarar miqdori haqida aniq maʼlumotlar berilmagan.
Ukraina Patrul politsiyasi departamenti rahbari Aleksey Biloshitskiyning xabar berishicha, hodisa tufayli M-06 Kiyev–Chop avtomobil yoʻlining 15-kilometridan 32-kilometrigacha boʻlgan qismida barcha transport vositalari harakati vaqtincha toʻxtatilgan.
Politsiya haydovchilar uchun yopilgan hududni aylanib oʻtish sxemasini ham eʼlon qildi.
Rasmiylar hozircha omborlarda aynan qanday mahsulotlar saqlangani va portlashlarga nima sabab boʻlgani haqida batafsil maʼlumot bermagan.