Kipr hukumati soliq to‘lamagan futbol klublariga “urush ochdi”

Kipr hukumati soliq qarzini to‘lamagan futbol klublariga qarshi keskin choralar ko‘rishga kirishdi. Mamlakatning to‘rtta mashhur futbol klubi – “Apoel”, “Anortosis”, “Apollon” va “AEL” – yaqin sakkiz kun ichida soliq qarzlarini to‘lamasa, ularning bank hisoblari muzlatilishi bilan tahdid qilindi.

Kipr Respublikasi soliq masalalari bo‘yicha komissari Sotiris Markidisning talabiga ko‘ra, ushbu klublar 20-avgustga qadar har biri qo‘shimcha qiymat solig‘i va daromad solig‘i bo‘yicha 1 million yevrodan qarzini to‘lashi shart. Markidis orol soliq xizmati klublarga hech qanday muddat uzaytirmasligini qat’iy ta’kidladi.

Agar hokimiyat talablari bajarilmasa, soliq idorasi qarzni undirish choralarini ishga tushiradi. Birinchi navbatda, barcha to‘rt klubning bank hisoblari muzlatiladi. Bu esa jamoalarni mavsum oralig‘ida tarkiblarini kuchaytirish uchun moliyaviy imkoniyatlardan mahrum etadi.

Agar bu choralar ham samara bermasa, keyingi bosqichda klublarning aktivlariga taqiq va cheklovlar qo‘yiladi. Zarurat tug‘ilsa, soliq islohoti doirasida qabul qilingan yangi chora qo‘llanilib, qarzdorlarga tegishli binolar muhrlanishi mumkin.

Markidis bilan uchrashgan yuqoridagi klublar vakillari soliq komissarining ogohlantirishlariga jiddiy munosabat bildirishdi va belgilangan muddatgacha qarzlarni to‘lash uchun zarur mablag‘ni yig‘ishga va’da berishdi.

Uchrashuv davomida Markidis Kipr futbol klublarining qarzdorliklari bo‘yicha noroziligini yashirmagan. Bu holat o‘tgan yilning may oyida Kipr futbol federatsiyasi ularga mamlakat chempionati va Yevrokuboklarda ishtirok etish uchun “yashil chiroq” yoqib, klublar UEFA mezonlariga javob berishini tasdiqlaganidan ko‘p o‘tmay yuz bergan edi.