Keraksiz dorilarni majburan sotish: Raqobat qo‘mitasi distribyutorlar ustidan shikoyatlarni o‘rganmoqda
Raqobat qo‘mitasi farmatsevtika distribyutorlarini talab yuqori dorilarga boshqa tovarlarni qo‘shib sotishdan ogohlantirdi. Importning 47,2 foizi 5 ta kompaniyaga to‘g‘ri kelmoqda. Idora bunday bosim kichik tadbirkorlarga zarar yetkazishi va qonunbuzarlarga tushumning 5% miqdorida jarima solinishini bildirdi.
Keraksiz dorilarni majburan sotish: Raqobat qo‘mitasi distribyutorlar bo‘yicha shikoyatlarni o‘rganmoqda
Raqobatni rivojlantirish va iste’molchilar huquqlarini himoya qilish qo‘mitasi farmatsevtika sohasida ulgurji distributsiya bilan shug‘ullanuvchi korxonalarni raqobat to‘g‘risidagi qonunchilik talablariga qat’iy rioya qilishga chaqirdi hamda qonunbuzarliklar uchun javobgarlik borligini eslatdi.
Ma’lum qilinishicha, so‘nggi 9 oy davomida mamlakatga 305 ta korxona tomonidan dori vositalari import qilingan. Shu bilan birga, bozorning katta qismi bir nechta yirik ishtirokchilar qo‘lida jamlangan: jami importning 47,2 foizi atigi 5 ta importyor hissasiga to‘g‘ri keladi.
Qo‘mita ma’lumotiga ko‘ra, oxirgi paytlarda ijtimoiy tarmoqlarda va tadbirkorlar orasida ayrim importyor hamda ulgurji distribyutorlar ustidan shikoyatlar ko‘paygan. Xususan, xaridorgir va talabi yuqori bo‘lgan dori vositalarini olishda boshqa, talabi kamroq yoki umuman buyurtma berilmagan preparatlarni ham majburan qo‘shib xarid qilish sharti qo‘yilmoqda.
“Bunday holatlar kichik tadbirkorlik subyektlarining iqtisodiy manfaatlariga zarar yetkazishi, ularning faoliyatini cheklashi va bozordagi raqobat muhitiga salbiy ta’sir ko‘rsatishi mumkin”, — deyiladi xabarda.
Shu sababli idora tomonidan ulgurji savdodagi raqobatga zid shartlar yuzasidan o‘rganishlar boshlangan.
“Raqobat to‘g‘risida”gi qonunning 14-moddasiga muvofiq, ustun mavqega ega bo‘lmagan subyektlarning bitim shartlariga, narxlarga yoki realizatsiya hududiga bir tomonlama ta’sir o‘tkazish imkoniyati ustun muzokara kuchi deb e’tirof etiladi. Qonunning 18-moddasiga ko‘ra, quyidagi harakatlar ustun muzokara kuchini suiiste’mol qilish hisoblanadi:
Qo‘mita raqobat to‘g‘risidagi qonunchilikni buzganlik uchun jiddiy moliyaviy sanksiyalar mavjudligini ham eslatdi. Sanksiya miqdori huquqbuzarlik sodir etilgan davrdagi (biroq oxirgi 3 yildan ortiq bo‘lmagan) tovarlarni realizatsiya qilishdan olingan tushum summasining 5 foizini tashkil etishi mumkin.
Hozirda idora tomonidan tegishli o‘rganishlar davom ettirilmoqda. Agar majburiy sotib olish shartlari va boshqa qonunbuzarliklar tasdiqlansa, aybdor subyektlarga nisbatan qonunchilikda belgilangan qat’iy choralar ko‘riladi.