Keniyalik oila qarindoshini oʻldirishda ayblanayotgan sobiq britan askarini topshirish boʻyicha sud majlisi kechiktirilganiga norozilik bildirdi
Kelasi oyda boʻlib oʻtishi kerak boʻlgan sud majlisining 2027 yil may oyiga qoldirilgani boʻyicha hech qanday rasmiy sabab keltirilmagan, deydi oila aʼzolari.
Keniyalik oila qarindoshining oʻlimida ayblanayotgan sobiq britan askarini ekstraditsiya qilish boʻyicha sud majlisi kechiktirilganiga eʼtiroz bildirmoqda
14 yil avval britan askari tomonidan oʻldirilgani aytilayotgan keniyalik ayolning oilasi gumonlanuvchini ekstraditsiya qilish boʻyicha sud majlisi 2027 yilning may oyiga koʻchirilganidan soʻng oʻz gʻazabini bildirdi.
2012 yilda Keniyadagi Britaniya armiyasining oʻquv lageri yaqinidagi septik rezervuardan jasadi topilgan Agnes Vanjiruning qarindoshlari bu kechikishni «mutlaqo qabul qilib boʻlmas» deb atadi va hokimiyat organlari ularni oʻz vaqtida xabardor qilmaganini aytdi.
21 yoshli onani oʻldirishda ayblanayotgan sobiq britan askari Robert Jeyms Perkiss boʻyicha sud majlisi keyingi oyga belgilangan edi. Oilaning aytishicha, u endi 2027 yilning may oyigacha qoldirilgan. Perkiss oʻtgan yilning noyabr oyida Buyuk Britaniyada hibsga olingan va qotillik boʻyicha sudlanish uchun Keniyaga ekstraditsiya qilinishiga qarshi chiqmoqda. U ayblovni rad etadi.
Vanjiruning jiyani Ester Njoki BBCga oila sudning qoldirilgani haqida Buyuk Britaniya elchixonasi orqali bilganini va ularga hech qanday rasmiy izoh berilmaganini aytdi.
«Biz yillar davomida sabr-toqat qildik va noaniqlikka chidadik, ammo endi sabrimiz suiisteʼmol qilinmoqda», — dedi u oʻz bayonotida.
«Agnes adolatga loyiq. Namunali qizi Steysi nima boʻlgani haqida javob olishga loyiq. Oila sifatida esa biz hayotimizga chuqur taʼsir qiluvchi sud jarayonlari haqida hurmat bilan munosabatda boʻlinishga va xabardor qilib turilishga loyiqmiz».
Oila uch haftadan keyin boʻlib oʻtishi kerak boʻlgan sud majlisi uchun Buyuk Britaniyaga borish maqsadida allaqachon pul yigʻib, safar taraddudini koʻrib qoʻyganini aytdi.
Endilikda u hokimiyat organlarini jarayonni tezlashtirishga chaqirib, oxirgi kechikish degani bu ish sudsiz 15-yiliga oʻtishini anglatishidan ogohlantirmoqda.
Oilaning taʼkidlashicha, kelasi hafta Buyuk Britaniya sudi majlis kechiktirilishi sabablarini tushuntirishi kutilmoqda.
Vanjiru 2012 yilning mart oyida Nayrobidan taxminan 200 km (124 mil) shimolda joylashgan, britan askarlari mashgʻulotlar uchun joylashgan Nanyuki shahridagi mehmonxonada oqshomni oʻtkazganidan keyin bedarak yoʻqolgan edi.
Murdasi deyarli uch oydan keyin oʻsha mehmonxonadagi septik rezervuardan topilgan. Uning koʻkrak va qorin qismida pichoq jarohatlari boʻlgan, undan besh oylik qizcha qolgan.
Keniyada oʻtkazilgan surishtiruv 2019 yilda u bir yoki ikki britan askari tomonidan noqonuniy ravishda oʻldirilgan degan xulosaga keldi.
2025 yilning sentyabr oyida Keniya Oliy sudi prokurorlar qotillik ayblovlarini asoslab beruvchi dalillarni taqdim etganidan soʻng Britaniya fuqarosini hibsga olishga order berdi.
Perkissning advokatlari u Keniyaga ekstraditsiya qilinishiga qarshi kurashmoqchi ekanini aytdi.
38 yoshli sobiq askar fevral oyida Vestminster magistratlar sudida videoaloqa orqali paydo boʻldi va u yerda uni qamoqda saqlash muddati uzaytirildi.
Oʻtgan yili Buyuk Britaniyaning oʻshandagi mudofaa vaziri Jon Xili Keniyaga tashrifi chogʻida Vanjiruning oilasi bilan uchrashdi va adolatni taʼminlash harakatlarini oʻz hukumati qoʻllab-quvvatlashiga vaʼda berdi.
Buyuk Britaniya hukumati ilgari oilaga yordam berish tarafdori boʻlib qolishini, ammo davom etayotgan huquqiy jarayonlar boʻyicha izoh bermasligini aytgan edi.