Kelin va kuyov boʻlmishning qoya choʻqqisidagi dramali qutqarilishi
Turmush qurishga rozilik berilgandan keyingi romantik sayr Irlandiya qirgʻoqlarida 150 metrlik arqon yordamida qutqarish amaliyotiga aylanib ketdi.
**Qoya tepasida kelin va kuyovning dramatik tarzda qutqarilishi**
«Achill Island» Sohil xavfsizlik xizmati koʻngillilari juftlikka yetib olish uchun tik qoyadan arqonda tushishdi
Unashtirilganidan koʻp oʻtmay sohilda sayr qilishga chiqqan juftlik koʻtarilayotgan suv toʻlqini sababli sohil qoyasi yonida qamshalib qolgach, Irlandiya Sohil xavfsizlik xizmati tomonidan qutqarilishiga toʻgʻri keldi.
Qutqaruvchilar juftlikka qayiqda yoki vertolyotda yetib bora olishmagani sababli, boʻlajak kelin va kuyov bexatar joyga — qoyaning tepasiga taxminan 150 metr (490 fut) balandlikka koʻtarib olindi.
Ushbu dramatik qutqaruv operatsiyasi dushanba kuni tushdan keyin Irlandiyaning Gʻarbiy sohilida joylashgan Axill orolida, kuchli shamol sharoitida yuz berdi.
Operatsiyaga boshchilik qilgan Sohil xavfsizlik xizmati koʻngillisi Piter MakManamon BBC News NI ga shunday dedi: «Ular juda baxtli insonlar ekan».
Taxmin qilinishicha, bu juftlik asli xorijlik boʻlib, Irlandiyada yashaydi va hodisa yuz berganda Mayo grafligi sohilida joylashgan Axill oroliga tashrif buyurgan edi.
MakManamonning aytishicha, juftlik Kil-Bich sohili boʻylab sayr qilayotganida, suv toʻlqini ularning ortidan koʻtarila boshlagan va bir nuqtada tizzadan yuqori darajaga yetgan.
«Ular Axillda unashtirilgan va [sohil boʻylab] sayr qilib, qoyaliklarga juda uzoqlab ketishgan», — deb tushuntirdi u.
«U yerda ob-havo sharoiti juda yomon edi va ushbu muayyan hududda suv toʻlqini juda tez koʻtarilgan».
Ortidagi baland qoya sababli qumlikni tark etishning iloji qolmagach, juftlik 999 raqamiga qoʻngʻiroq qilib, sohil xavfsizlik xizmatidan qutqarishni soʻragan.
«Shamol kuchi 8 dan 10 ballgacha esayotgan edi va toʻlqin sharoiti yoʻl qoʻymagani sababli, RIB (qattiq puflanadigan qayiq) yuborish juda xavfli edi», — dedi MakManamon.
«Biz qoyalar boʻylab ular tomon piyoda borishga harakat qildik, ammo... toʻlqinlar uzluksiz kelayotgan edi va ekipajni xavf ostiga qoʻyish juda xatarli edi, shuning uchun vertolyot jalb qilindi».
Sligo grafligida joylashgan R118 Sohil xavfsizlik vertolyoti voqea joyiga uchib keldi, ammo kuchli shamol sababli ekipaj chorasiz qolgan juftlikka yordam bera olmadi.
«Vertolyot kelganida, ularni chigʻiriq (vinch) bilan tortib olish uchun yaqinlashishga harakat qildi, ammo togʻdan esayotgan kuchli pastga yoʻnalgan havo oqimi bunga imkon bermadi», — deb tushuntirdi MakManamon.
Shundan soʻng u «Achill Island» Sohil xavfsizlik xizmatining qoyada qutqaruv guruhi alpinistlarini yubordi, ular juftlikni koʻtarilayotgan suvdan olib chiqish uchun qoyadan arqon bilan tushishdi.
«Suv ularning atrofida koʻtarilayotgan edi — taxminan tizzalaridan balandroq darajada edi», — deb eslaydi MakManamon.
Juftlik bexatar joyga bosqichma-bosqich olib chiqildi. Ayol birinchi boʻlib balandroq maydonga olib chiqildi, uning qayligʻi esa oyoqlari atrofida «toʻlqinlar urilayotgan» bir paytda kutib turdi.
Ikkalasi ham bevosita xavfdan xoli boʻlgach, alpinistlar arqonlar yordamida ularni alohida-alohida qoya tepasiga yana 150 metr balandlikka tortib olishdi.
«Ular juda sovuqqotgan edi — gipotermiya (tana sovub ketishi) boshlanayotgan edi», — dedi MakManamon.
Ammo ushbu olis va goʻzal goʻshaga transport vositasida borib boʻlmas edi, shu sababli jabrlanganlar kutib turgan tez yordam mashinasigacha teppalikdan pastga qarab 2 km (1,2 milya) piyoda yurishlariga toʻgʻri keldi.
U yerda tibbiyot xodimlari ularga birinchi yordam koʻrsatishdi va tekshiruvlar uchun shifoxonaga olib ketishdi, ammo ularni shifoxonaga yotqizishga hojat qolmadi.
Qutqaruv operatsiyasi guruhning yetti soatdan ortiq vaqtini oldi
MakManamonning taʼkidlashicha, bunday ob-havo sharoitida sohil boʻyidagi qoyalar boʻylab sayr qilish hech qachon xavfsiz emas.
«Bu xavfli joy boʻlishi mumkin, mahalliy aholi umuman bu yerga yaqinlashmaydi», — dedi u va sohilning boshqa qismlari sayr qilish yoki choʻmilish uchun moslashganini qoʻshimcha qildi.
MakManamon 20 yildan beri Irlandiya Sohil xavfsizlik xizmati aʼzosi hisoblanadi va oxirgi yetti yil davomida «Achill Island» Sohil xavfsizlik boʻlinmasida «masʼul ofitser» boʻlib ishlab kelmoqda.
Bu koʻngillilik asosidagi lavozimdir.
Dushanba kungi qutqaruv operatsiyasi yetti soatdan ortiq davom etdi va uning ekipaji qoyani mahalliy vaqt bilan soat 21:30 larda tark etdi.
«Men ular [juftlik] bilan tuzukkina gaplashishga imkon topganim yoʻq, oʻz guruhimni tashkillashtirish bilan juda band edim», — dedi MakManamon.
«Biz shunchalik ivib ketgan va och edikki, faqatgina oʻzimizni tartibga keltirishni, uskunalarimizni yigʻishtirishni hamda oʻz uylarimiz va oilalarimiz bagʻriga yetib olishni istardik».
MakManamon bu u duch kelgan eng dramatik unashtiruv voqealaridan biri boʻlganini tan oldi.
Shu oy boshida oʻz toʻyining 25 yilligini nishonlagan ofitser, ushbu juftlik bilan qandaydir bogʻliqlikni his qiladi — aslida Kil-Bich uning oʻz turmush oʻrtogʻiga ham turmush qurish taklifini bildirgan joyi boʻlgan.
Biroq, u taklifni «sohilning xavfsiz tomonida» qilganini alohida taʼkidlab oʻtdi.