Kanadadagi haqiqat va yarashuv tadbirida piyodalarni mashina urib yuborishi oqibatida ikki kishi halok boʻldi
Politsiyaning maʼlum qilishicha, Britan Kolumbiyasida haydovchi toʻrt nafar piyodani urib yuborishdan oldin «toʻsatdan sogʻligʻi yomonlashgan».
Kanadada haqiqat va yarashuv kuniga bagʻishlangan tadbirda piyodalar urib yuborilishi oqibatida ikki kishi halok boʻldi
Hodisa Kanadadagi internat-maktablar qurbonlari va omon qolganlar xotirasiga bagʻishlangan milliy bayram — Haqiqat va yarashuv kuni munosabati bilan oʻtkazilgan yurish paytida sodir boʻlgan.
Britan Kolumbiyasida Kanadaning Milliy haqiqat va yarashuv kuniga bagʻishlangan jamoatchilik yurishi paytida avtomobil piyodalarni urib yuborishi oqibatida ikki kishi halok boʻldi, yana ikki kishi jarohatlandi.
Toʻqnashuv Vankuver janubida, AQSh-Kanada chegarasi yaqinidagi Tsavvassen birinchi millati (tub aholi) hududida yuz bergan.
Politsiyaning maʼlum qilishicha, haydovchi toʻqnashuvdan oldin "toʻsatdan sogʻligʻi yomonlashgan boʻlishi mumkin" va jamoat xavfsizligiga hech qanday tahdid yoʻq.
Shuningdek, ular ushbu hodisaning tub aholi bolalarini majburiy assimilyatsiya qilishga qaratilgan Kanada internat-maktablari qurbonlari va omon qolganlari xotirasiga bagʻishlangan milliy bayram — Haqiqat va yarashuv kuniga aloqasi bor deb hisoblashmasligini bildirishdi.
Hodisa sodir boʻlgan hududga masʼul Delta politsiya boshqarmasi toʻqnashuv mahalliy vaqt bilan taxminan 10:25 da (Britan yozgi vaqti bilan 16:25) mahalliy avtoturargohda yuz berganini maʼlum qildi.
Politsiya voqea joyida tergov olib borayotganini va aholidan ushbu hududga yaqinlashmaslikni soʻraganini bildirdi. Shuningdek, jarohatlangan ikki kishi shifoxonada davolanayotgani qoʻshimcha qilindi.
"Bizning fikru xayolimiz ushbu fojiali hodisadan jabr koʻrganlar, ularning oilalari va yaqinlari bilan birga", — dedi Delta politsiyasi.
Voqea joyidagi CBC News muxbirlarining guvohlik berishicha, hodisa joyiga oʻndan ortiq tez yordam mashinasi yetib kelgan.
Oʻtgan hafta tadbirni targʻib qiluvchi ijtimoiy tarmoqdagi postda Tsavvassen birinchi millati Milliy haqiqat va yarashuv kuni sharafiga jamoatchilik yurishi va undan keyin uy ustunining ochilish marosimini rejalashtirganini maʼlum qilgan edi.
Tadbir mahalliy vaqt bilan soat 09:30 dan 13:00 gacha davom etishi kerak edi.
Kanada energetika vaziri Tim Xojson hozirda oʻchirib tashlangan X tarmogʻidagi postida ushbu yurishda ishtirok etganini maʼlum qilgan va tadbirdan ikkita surat ulashgan edi.
Toʻqnashuv yuz bergan vaqtda u hali ham oʻsha yerda boʻlgan-boʻlmagani nomaʼlum.
Rasmiy sayt maʼlumotlariga koʻra, Tsavvassen birinchi millati 491 aʼzodan iborat boʻlib, ularning yarmi Tsavvassen yerlarida, qolganlari esa yaqin atrofdagi hududlarda, jumladan, chegara ortidagi Bellingemda (Vashington shtati) yashaydi.
Kanada sobiq internat-maktablar hududida belgisiz qabrlar topilganidan keyin, 2021 yildan boshlab Milliy haqiqat va yarashuv kunini nishonlashni boshlagan.
Ushbu bayram internat-maktablarda bedarak yoʻqolgan yoki halok boʻlgan bolalar xotirasiga bagʻishlangan tub aholi tashabbusi bilan tashkil etilgan "Toʻq sariq koʻylak kuni" bilan bir kunga toʻgʻri keladi.