Kanada rossiyalik hokkeychilarni yoshlar o‘rtasidagi JCHga kiritmaydi — bosh vazir Karni
Sport arbitraj sudi ruxsatiga qaramay, Kanada Rossiya hokkey jamoasini yoshlar o‘rtasidagi JCHga qo‘ymasligini e’lon qildi. Bosh vazir Mark Karni Ukrainadagi urush sababli Rossiya va Belarus sportchilari mamlakat hududida o‘tadigan har qanday musobaqalarda qatnasha olmasligini ta’kidladi.
Kanada rossiyalik hokkeychilarni yoshlar o‘rtasidagi JCHga qo‘ymaydi — bosh vazir Karni
Kanada Rossiya terma jamoasining Alberta provinsiyasida o‘tkaziladigan hokkey bo‘yicha yoshlar o‘rtasidagi Jahon chempionatida qatnashishiga yo‘l bermaydi. Bu haqda mamlakat bosh vaziri Mark Karni ma’lum qildi.
Karni Rossiya-Ukraina urushi davom etayotgan bir paytda Rossiya va Belarus sportchilari Kanadada bo‘lib o‘tadigan hech qanday musobaqaga kiritilmasligini ta’kidladi.
“Agar siz aynan yoshlar o‘rtasidagi Jahon chempionati haqida so‘rayotgan bo‘lsangiz, rossiyaliklar u yerda bo‘lmaydi”, — dedi u (Reuters iqtibosi).
Rossiyaning Kanadadagi elchisi Oleg Stepanov Karnining “siyosatni hatto ajratish emas, birlashtirishga xizmat qilishi kerak bo‘lgan yoshlar hokkeyiga ham olib kirayotgan” bayonotlarini “afsuslanarli” deb atadi.
“Ottava birinchi shayba tashlanmasidan oldinroq jiddiy raqiblardan juda ehtiyotkorlik bilan xalos bo‘lmoqda”, — deya qayd etdi u.
Oktabr oyi oxirida Sport arbitraj sudi Xalqaro hokkey federatsiyasi zimmasiga Rossiya terma jamoasini xalqaro musobaqalarda ishtirok etishiga ruxsat berish majburiyatini yuklagandi.
Hokkey bo‘yicha nufuzli davlatlarning katta qismi bu qarorni tanqid qilgan. Kattalar o‘rtasidagi Jahon chempionatiga mezbonlik qiluvchi Germaniya rossiyaliklar ishtirok etgan taqdirda, turnirni o‘tkazishdan bosh tortishi mumkinligini bildirgan. Shvetsiya, Finlyandiya, Latviya, Norvegiya va Daniya musobaqaning o‘zini boykot qilmasligini, biroq Rossiya terma jamoasiga qarshi muzga chiqmasligini ma’lum qilgan.
Hokkey bo‘yicha yoshlar o‘rtasidagi JCH 26-dekabrdan 5-yanvarga qadar bo‘lib o‘tadi.