Kanada Qirol Charlz portreti tasvirlangan yangi 20 dollarlik banknotni taqdim etdi
Vertikal banknotada Qirol Charlz III tasvirlangan boʻlib, u 70 yildan ortiq vaqt ichida Kanada banknotasida paydo boʻlgan birinchi yangi monarxdir.
Kanada Qirol Charlz portreti tushirilgan yangi 20 dollarlik banknotani taqdim etdi
Vertikal polimer banknota kelasi yilning boshida muomalaga kiritilishi rejalashtirilgan.
Kanada Qirol Charlz III portreti tushirilgan yangi 20 dollarlik banknotani taqdim etdi. Bu 2022 yilda Qirolicha Yelizaveta II vafotidan keyin, 70 yildan ortiq vaqt ichida birinchi marta Kanada banknotasida yangi monarxning paydo boʻlishidir.
Banknota payshanba kuni Kanada Banki tadbirida taqdim etildi va markaziy bank rahbari Tiff Maklem buni «juda maxsus kun» deb taʼrifladi.
Banknotaning oʻziga xos xususiyatlaridan biri uning vertikal koʻrinishidir. Orqa tomonida Kanadaning Ikkinchi jahon urushidagi rolini xotirlash uchun Frantsiyadagi Vimi Rij memoriali tasviri joylashtirilgan.
Hamdoʻstlik davlatlaridan Yangi Zelandiya va Avstraliya Qirol tasvirini oʻz tangalariga joylashtirdi, garchi Avstraliya uni banknotalarga joylashtirmasligini maʼlum qilgan boʻlsa-da.
Buning oʻrniga, Avstraliya Qirolicha Yelizaveta II tasvirlangan hozirgi dizaynni almashtirish uchun mahalliy avstraliyaliklarning «madaniyati va tarixini» sharaflovchi yangi 5 dollarlik banknotani ishlab chiqishini bildirdi.
Kanada Buyuk Britaniyadan tashqarida Qirol monarx boʻlganidan beri uni oʻz banknotalariga joylashtirgan birinchi Hamdoʻstlik davlatidir.
Kanada Bankining maʼlum qilishicha, banknotada «Qirolning butun umri davomida atrof-muhitga boʻlgan sadoqatidan ilhomlangan» gul va barglardan iborat naqsh ham mavjud.
Liberal deputat va Kanada Daromadlar agentligi davlat kotibi Ueyn Long taqdimotda banknotadagi ramzlar «bizning millat sifatida kim ekanligimiz va nimani qadrlashimizni kuchli eslatib turishini» aytdi.
Markaziy bank baʼzi elementlar mahalliy aholi maslahat kengashi bilan kelishilgan holda tanlanganini bildirdi.
Bu Kanadada chiqarilgan ikkinchi vertikal banknotadir. Birinchisi qora tanlilar huquqlari himoyachisi Viola Desmond tasvirlangan 10 dollarlik kupyura edi. Uning dizayni keyinchalik 2018 yilda Xalqaro banknotalar jamiyati tomonidan dunyodagi eng yaxshi dizayn deb topilgan.
Maklem yangi 20 dollarlik banknota kelasi yilning boshida muomalaga kirishini aytdi.
Soʻrovnomalar shuni koʻrsatadiki, koʻplab kanadalikliklar, ayniqsa frantsuz tilida soʻzlashuvchi Kvebekda, mamlakat Britaniya monarxiyasi bilan rasmiy aloqalarini tugatishi kerak deb hisoblaydi.
Biroq, Kanada va AQSh oʻrtasidagi keskinlik, jumladan, davom etayotgan AQSh-Kanada savdo urushi va AQSh Prezidenti Donald Trampning Kanadani «51-shtat» qilish haqidagi bayonotlari fonida monarxiyaning mashhurligi biroz oshdi.
Bosh vazir Mark Karni may oyida Qirolni Kanada parlamentini ochib berishga taklif qildi. Karni oʻsha paytda bu tashrif «mamlakatimiz suverenitetini yaqqol koʻrsatib turishini» aytgan edi.
Qirol Kanada davlat rahbari hisoblanadi va Kanadada uning vakili general-gubernator Meri Saymondir.