Kanada provintsiyasi OpenAI ustidan Tambler-Rij maktabidagi otishma boʻyicha daʼvo arizasi kiritdi
Britan Kolumbiyasi kompaniyani merganning ChatGPT bilan boʻlgan tashvishli muloqotlari haqida huquq-tartibot idoralariga xabar bermaganlikda aybladi.
Kanada provintsiyasi OpenAI kompaniyasini Tambler-Rij maktabidagi otishma boʻyicha sudga berdi
Kanada provintsiyasi OpenAI kompaniyasini Tambler-Rijdagi ommaviy otishmadan oldin ChatGPT’dagi xavotirli foydalanuvchi faolligi haqida rasmiy organlarni ogohlantirmaganlikda ayblab, sudga daʼvo arizasi kiritdi.
Kompaniya 18 yoshli Jessi Van Rutselaar fevral oyida sakkiz kishini, jumladan olti nafar bolani oʻldirishidan oldin uning akkaunti haqida huquq-tartibot idoralariga xabar bermagani uchun allaqachon uzr soʻragan.
Britan Kolumbiyasi bosh prokurori Niki Sharmaning taʼkidlashicha, dushanba kuni AQSh federal sudiga taqdim etilgan daʼvo arizasi "texnologiya kompaniyalarining jiddiy zoʻravonlik xavfi mavjudligidan xabardor boʻlgandagi masʼuliyati" masalasini oʻrtaga tashlaydi.
Otishmada halok boʻlganlar va jarohatlanganlarning oilalari OpenAI ustidan alohida daʼvo arizalari bilan murojaat qilishgan.
OAV xabarlariga koʻra, Van Rutselaarning ChatGPT’dagi faolligi hujumdan bir necha oy oldin qurolli zoʻravonlikka oid mazmuni tufayli OpenAI xavfsizlik xizmati tomonidan belgilab qoʻyilgan, biroq kompaniya bu haqda mahalliy hokimiyat organlarini xabardor qilmagan.
Aprel oyida OpenAI bosh ijrochi direktori Sem Altman qurbonlarning oilalaridan uzr soʻragan edi.
"Huquq-tartibot idoralarini ogohlantirmaganimizdan chuqur afsusdaman", deb yozgan edi Altman oʻz ochiq xatida.
"Bugungi kunga qadar OpenAI omon qolganlar, oilalar va Tambler-Rij hamjamiyati tomonidan bildirilgan xavotirlarni hal qilish uchun sezilarli qadamlar qoʻymadi", dedi Sharma oʻz bayonotida.
"Kompaniyada hali ham xavfsizlik choralarini kuchaytirish, shaffoflikni oshirish va kelajakda shu kabi fojialarning oldini olishga yordam beradigan aniq choralar koʻrish orqali masʼuliyatni namoyish etish imkoniyati bor".
Dushanba kuni jurnalistlar bilan suhbatda Sharma OpenAI chatlari mazmunini oʻqib chiqmaganini aytdi.
"Biz OpenAI’dan ushbu chatlarni oshkor qilishni soʻradik. Ular rad etishdi. Hammamiz ulardan soʻrashimiz kerak: Nima uchun?" dedi u CBC xabariga koʻra.
Sharmaning soʻzlariga koʻra, daʼvo arizasi Kaliforniyada topshirilgan, chunki otishma sodir etgan shaxsning ChatGPT akkaunti haqida xabar bermaslik toʻgʻrisidagi qaror AQShning aynan shu shtatida qabul qilingan, deb xabar beradi AFP.
Sharma jurnalistlarga provintsiya tomonidan undiriladigan har qanday moliyaviy tovon puli oʻrta maktabni qayta tiklashga yoʻnaltirilishini aytdi.