Kallas: Rossiyaning gibrid hujumlari butun Yevropada odamlar hayotiga xavf solmoqda
Yevropa Ittifoqining tashqi ishlar va xavfsizlik siyosati boʻyicha oliy vakili Kaya Kallas Rossiyani Yevropada gibrid hujumlar, qoʻporuvchilik urinishlari va havo hududini buzish holatlarini kuchaytirishda aybladi. Uning taʼkidlashicha, bu harakatlar Ukrainadan tashqarida ham odamlar hayotiga tahdid solmoqda.
Kallas: Rossiyaning gibrid hujumlari butun Yevropada odamlar hayotiga xavf tugʻdirmoqda
Kallas bu haqda 5-oktabr kuni Bryusselda Moldova bosh vaziri Vasile Tofan bilan oʻtkazilgan matbuot anjumanida maʼlum qildi
Yevropa diplomatiyasi rahbari soʻnggi haftalarda qitʼada Rossiya bilan bogʻliq gibrid hujumlar, diversiya urinishlari va havo hududining buzilishi holatlari keskin ortganini aytdi.
«Oʻtgan dam olish kunlarida Rossiya raketalari va dronlari Moldova havo hududini yana buzdi. Bu mutlaqo nomaqbul», - dedi Kallas.
Uning fikricha, Moskva bunday harakatlar orqali qoʻrquv uygʻotish va Yevropa davlatlarining qaror qabul qilish jarayonini izdan chiqarishga urinmoqda. Kallas bunga javoban xavf-xatarlarga chidamlilikni oshirish va Ukrainani qoʻllab-quvvatlashni kuchaytirish zarurligini taʼkidladi.
Sentabr oxirida Rossiya Ukrainaning energetika tizimiga zarbalarni kuchaytirgan, Kiyev va mamlakatning boshqa hududlari ham hujumga uchragan. Shu hujumlar fonida Moldova Mudofaa vazirligi mamlakat havo hududiga uchta uchuvchisiz uchish apparati kirganini maʼlum qilgan.
Germaniya kansleri Fridrix Mers ham avvalroq Rossiya tomonidan yangi gibrid hujumlar sodir etilishi mumkinligidan ogohlantirgan edi.
Germaniya rasmiylari Moskva dronlar va kiberhujumlardan foydalanib gibrid kampaniya olib borayotganini bir necha bor bildirgan. Jumladan, Berlin avgust oyida Leypsig aeroportida dron yordamida hujum uyushtirishga urinish ortida Rossiya turganini daʼvo qilgan.