Jurnalistlar tanlovi: hayotga boshqacha qarashga undaydigan 10 ta film

**Jurnalistlar tanlovi: hayotga boshqacha qarashga undaydigan 10 ta film**

Collider sayti tomoshabin dunyoqarashiga jiddiy ta’sir qilishi yoki uni o‘z hayotiga boshqacha nazar bilan qarashga majbur etishi mumkin bo‘lgan 10 ta film ro‘yxatini e’lon qildi. Mualliflar ta’kidlashicha, bu yerda faqat ruhlantiruvchi asarlar haqida gap ketmaydi: reytingga kirgan ayrim filmlar, aksincha, og‘ir tuyg‘ularni uyg‘otib, odamni pessimist kayfiyatga solib qo‘yishi ham mumkin.

Birinchi pog‘onani Akira Kurosavaning 1952-yilda suratga olingan “Yashash” filmi egalladi. Asarning bosh qahramoni — o‘ziga o‘lim tashxisi qo‘yilganini bilib qolgan va umrining katta qismini shunchaki bir xil maromda o‘tkazganini anglab yetgan amaldor. Yaqinlashib kelayotgan o‘limni his etishi uni chinakam muhim ish qilishga undaydi. Jurnalistlar fikricha, film juda kech bo‘lmasidan harakat qilish kerakligi haqida so‘zlaydi, biroq buni haqqoniy tarzda, hech qanday pand-nasihat va ochiq chaqiriqlarsiz yetkazadi.

Ikkinchi o‘rinni Stiven King asarlaridan biri — “Shoushenkdan qochish” egalladi. Syujet markazida hayotga turlicha qaraydigan, ammo asta-sekin yaqin do‘stlarga aylanuvchi ikki mahbus turadi. Collider nashri filmni umid, do‘stlik va hatto o‘ta og‘ir sharoitlarda ham yashashni davom ettirish irodasi haqidagi hikoyasi sabab bunday ro‘yxatlarning deyarli ajralmas qismi deb hisoblagan.

Kuchli uchlikni davomiyligi bir soatdan sal ko‘proq bo‘lgan “Qanday ajoyib kun” animatsion filmi yakunlaydi. Unda asta-sekin ongining bir qismini yo‘qotib borayotgan Bill ismli oddiy inson haqida hikoya qilinadi: uning kundalik hayoti tobora murakkablashib boradi, xotiralari esa xiralashadi. Bu yerda minimalistik animatsiya va deyarli yo‘q dialoglar qora hazil bilan uyg‘unlashgan, biroq finalga kelib g‘amgin va hissiy epizodlar komediyadan ancha ustun keladi.

Reytingning boshqa ishtirokchilari orasida ta’tilga birga yo‘l olgan qiz va uning otasi haqidagi “Mening quyoshim” filmi ham bor. Film davomida deyarli hech qanday muhim voqea yuz bermaydi, ammo finalga yaqin syujet avval ko‘ringanidan ancha og‘ir va chuqur ma’noli tus oladi.

Ro‘yxatdagi yana bir kartina — “Orzu uchun rekviyem” — turli qaramliklar to‘rtta bosh qahramon hayotini asta-sekin qanday vayron qilishini ko‘rsatadi.

Nashrning yozishicha, film ataylab ochiq-oydin ishlangan bo‘lib, qahramonlarning qarorlarini takrorlash istagini uzoq vaqtga so‘ndirishga qodir.