Jorjina Rodriges Ronalduning farzandlarini qonuniy asrab oldi

**Jorjina Rodriges Ronaldu farzandlarining qonuniy onasiga aylandi**

Yaqinda Krishtianu Ronaldu bilan turmush qurgan Jorjina Rodriges endi futbolchining uch nafar to‘ng‘ich farzandi uchun ham qonuniy ona maqomini oldi. Portugaliya nashrlarining xabar berishicha, Jorjina 2010-yilda tug‘ilgan Krishtianu Junior hamda 2017-yil iyunida dunyoga kelgan egizaklar Yeva Mariya va Mateoni rasman asrab olgan.

Manbalarga ko‘ra, Jorjina bu bolalarga har doim o‘z farzandlaridek munosabatda bo‘lgan. Onalik uning uchun ustuvor ahamiyatga ega bo‘lib, u bolalar tarbiyasida faol ishtirok etadi. Jorjina o‘zining ijtimoiy tarmoqlardagi sahifalarida ham o‘zini faxr bilan "beshta farzandning onasi" deb ataydi.

Ushbu asrab olish jarayoni natijasida Jorjina futbolchi bilan mutlaqo teng ota-onalik huquqiga ega bo‘ldi. Matbuot xabarlariga ko‘ra, bu jarayon "maxfiy asrab olish" maqomida, barcha hujjat ishlari ommaviy axborot vositalaridan sir saqlangan holda amalga oshirilgan.

Eslatib o‘tamiz, Ronaldu va Jorjinaning ikki nafar umumiy farzandi ham bor. Ularning birinchi qizi Alana 2017-yil oxirida tug‘ilgan bo‘lsa, 2022-yilda Bella Esmeralda dunyoga kelgan (uning egizak ukasi tug‘uruq vaqtida vafot etgan).

Oiladagi bu muhim o‘zgarishlar yilning eng kutilgan to‘yidan bir hafta o‘tib sodir bo‘ldi. Ronaldu va Jorjina Portugaliyaning Kashkaysh hududidagi 60 million yevroga baholangan qasrida, faqat farzandlari ishtirokida, tor doirada turmush qurishgan edi. To‘y sanasi ham ramziy ma’noga ega bo‘lib, juftlikning unashtirilganiga roppa-rosa bir yil, ilk uchrashuvlariga esa 10 yil to‘lgan edi.

2016-yilda ular ilk bor uchrashganida, Jorjina Madriddagi Gucci do‘konida oddiy sotuvchi bo‘lib ishlagan, Ronaldu esa "Real" futbolchisi edi. Bugungi kunga kelib, Jorjina nafaqat futbolchining rafiqasi, balki shaxsiy kiyim brendiga, o‘zining realiti-shousiga va 80 millionlik ijtimoiy tarmoq auditoriyasiga ega bo‘lgan taniqli shaxsga aylangan.