Jizzax viloyatida 56 nafar bolani tashib ketayotgan ikkita «Damas» avtomobili aniqlandi

Jizzax viloyatida 56 nafar bolani olib ketayotgan ikkita "Damas" avtomobili aniqlandi

Jizzax viloyatida huquq-tartibot idoralari xodimlari har birida 28 nafardan bogʻcha tarbiyalanuvchisini olib ketayotgan ikkita "Damas" avtomobili haydovchisini aniqladi. Ikkita transport vositasida jami 56 nafar bola boʻlgan.

Huquq-tartibot idoralari xodimlari ota-onalarni oʻz farzandlari xavfsizligiga befarq boʻlmaslikka hamda ularni tashishda xavfsizlik talablari va yoʻlovchilarning yoʻl qoʻyiladigan soniga rioya qilinishiga alohida eʼtibor qaratishga chaqirdi.

Bundan avval qoidalarning bunday buzilishi ogʻir oqibatlarga olib kelgan edi. Xususan, Andijon viloyatida salonida 21 nafar bola boʻlgan "Tracker" avtomobili haydovchisi yoʻl-transport hodisasiga uchragan.

Bundan tashqari, shunga oʻxshash holat Navoiy viloyatida ham yuz bergan boʻlib, u yerda "Matiz" avtomobili haydovchisi 14 nafar bolani olib ketayotgan boʻlgan. YTH natijasida haydovchi vafot etgan, salondagi voyaga yetmaganlar esa turli darajadagi tan jarohatlari olib, shifoxonaga yotqizilgan.