JCH-2026 finalida raqibini urgan Paredes 10 ta oʻyinga chetlatildi
FIFA Argentina milliy jamoasini siyosiy namoyishlar, muxlislarning kamsituvchi hayqiriqlari va finaldagi janjal uchun jazoladi. Shuningdek, Argentina milliy jamoasining 4 vakili va Ispaniya jamoasining 1 oʻyinchisi jarimaga tortilib, oʻyinlardan chetlatildi.
JCH-2026 finalida raqibini urgan Paredes 10 ta oʻyinga chetlatildi
Xalqaro futbol federatsiyasi (FIFA) intizom qoʻmitasi 2026-yilgi Jahon chempionati yakunlari boʻyicha Argentina futbol assotsiatsiyasini (AFA) 321 ming dollar miqdorida jarimaga tortdi. Bu haqda FIFA matbuot xizmati xabar berdi.
Sanksiyalar FIFA Intizom kodeksining toʻrtta moddasini buzganlik uchun qoʻllanilgan:
* Sport tadbiridan sportga aloqador boʻlmagan namoyishlar uchun foydalanish;
* Jamoaning nomaqbul xatti-harakati;
* Diskriminatsiya va irqchilikka oid haqoratlar;
* Oʻyinlardagi tartib va xavfsizlik.
Bundan tashqari, AFA keyingi ikkita uy oʻyinini cheklangan miqdordagi tomoshabinlar bilan (stadion sigʻimining 50 foizidan koʻp boʻlmagan) oʻtkazishi shart. Jarima summasining 100 ming dollari diskriminatsiyaga qarshi kurash dasturiga yoʻnaltirilishi lozim. Sanksiyalarning bir qismi – bitta oʻyin va 100 ming dollar jarima – sinov muddati bilan kechiktirildi.
JCH-2026 yarimfinalida Angliya ustidan qozonilgan gʻalabadan soʻng, argentinalik futbolchilar "Las Malvinas son Argentinas" (Malvin orollari – Argentinaga tegishli) yozuvli bannerni yoyishdi – bu siyosiy namoyish sifatida baholandi. Folklend orollari (Argentinada ularni Malvin orollari deb atashadi) atrofidagi mojaro XX asrdan beri davom etib keladi. 1982-yilda Buyuk Britaniya va Argentina oʻrtasida ushbu arxipelag uchun urush boʻlib oʻtdi va buning oqibatida 649 nafar argentinalik va 255 nafar britaniyalik harbiy xizmatchi halok boʻldi. Orollar britaniyaliklar nazorati ostida qoldi.
Intizom qoʻmitasi, shuningdek, final oʻyinidan keyingi janjal tufayli Leandro Paredes, Nauel Molina, Tiago Almada va Roberto Ayala (barchasi – Argentina) hamda Gaviga (Ispaniya) nisbatan sanksiyalar qoʻlladi. Janjal Molinaning ispanlar sardori Rodriga zarba berishi bilan boshlandi. Shundan soʻng Paredes ispanlar himoyachisi Erik Garsiyaning boʻynidan boʻgʻdi, Gavini itarib yubordi. Futbolchilarni jamoadoshlari ajratib qoʻyishdi. Argentina milliy jamoasi murabbiylar shtabi aʼzosi Roberto Ayala esa ispaniyalik yarimhimoyachi Dani Olmoga zarba berishga urindi.
Eng ogʻir jazo Paredesga tayinlandi – yarimhimoyachi milliy jamoa safidagi 10 ta oʻyindan chetlatildi va 90 ming dollar miqdorida jarimaga tortildi. Molina 7 oʻyinga diskvalifikatsiya qilindi va u ham 90 ming dollar jarimaga tortildi. Murabbiy Ayala 3 ta oʻyindan chetlatildi va 30 ming dollar jarimaga tortildi. Almada va Gavi bittadan oʻyinga diskvalifikatsiya qilindi va ularning har biri 30 ming dollardan jarimaga tortildi.
Eslatib oʻtamiz, JCH-2026 finali Ispaniyaning Argentina ustidan 1:0 hisobidagi gʻalabasi bilan yakunlandi. Yagona golni qoʻshimcha vaqtlarda Ferran Torres urdi, natijada Ispaniya tarixda ikkinchi marta jahon chempioni boʻldi.