Javobsiz savollar. IIB Jizzaxda kelinning kamsitilishi bilan bogʻliq voqeaga izoh berdi

2 soat oldin

Jizzax viloyati huquq-tartibot idoralari 6 sentyabr kuni koʻplab kuyish jarohatlari bilan shifoxonaga yotqizilgan yosh ayolning voqeasi yuzasidan izoh berdi. IIB jarohatlar borligini tasdiqladi va tergov boshlanganini maʼlum qildi, biroq jabrlanuvchi qanday sharoitda jarohat olgani va bunga boshqa shaxslarning aloqasi bor-yoʻqligiga aniqlik kiritmadi.

Sharof Rashidov tumani «Qahramon» mahallasida yashovchi ayol 6 sentyabr kuni qaynoq suvdan kuyish jarohati olganidan keyin Respublika shoshilinch tibbiy yordam ilmiy markazining Jizzax filialiga olib kelingan.

Shifokorlar ayolda tana yuzasining 6–8 foizida 2–3-darajali kuyishni tashxislashgan. Jarohatlar chap qoʻl va yelka, chap oyoq soni, oʻng tizza va qorin sohasiga shikast yetkazgan.

Mazkur holat yuzasidan tezkor-tergov guruhi tuzildi. Tergovchilar voqea joyini koʻzdan kechirib, ashyoviy dalillarni rasmiylashtirishdi va sud-tibbiy ekspertizasini tayinlashdi.

8 sentyabr kuni Sharof Rashidov tumani IIB huzuridagi tergov boʻlimi tomonidan jinoyat ishi qoʻzgʻatildi, tergov harakatlari davom etmoqda. IIB hodisaning barcha holatlari, jumladan, ijtimoiy tarmoqlarda tarqalayotgan maʼlumotlar tekshirilishini va tergov yakunlari boʻyicha voqeaga huquqiy baho berilishini maʼlum qildi.

Shu bilan birga, ushbu voqeani jamoatchilikka oshkor qilgan «NemolchiUz» loyihasi gap besh kishi ishtirokidagi guruhli qiynoqlar haqida ketayotgan boʻlishi mumkinligini daʼvo qilmoqda. Bu maʼlumotlar hozircha rasman tasdiqlanmagan. Nashr mualliflari, shuningdek, nima uchun oila uzoq vaqt davomida ishning borishi haqida maʼlumot olmagani va nima uchun huquq-tartibot idoralari faqat voqea oshkor boʻlganidan keyin faollashgani haqida savollar bermoqda.

Loyiha maʼlumotlariga koʻra, jabrlanuvchining bolasi hozirda onasi va buvisi bilan birga, uning sogʻligʻiga hech narsa tahdid solayotgani yoʻq. Ayolning kuygan joylari sekin-asta bitmoqda.