Japarov Markaziy Osiyoning olti davlati va Ozarbayjon uchun yagona turistik viza joriy etishni taklif qildi
Japarov Markaziy Osiyoning olti davlati va Ozarbayjon uchun yagona turistik viza joriy etishni taklif qildi
Qirgʻiziston Prezidenti Sadir Japarov sayohatlarni osonlashtirish va diqqatga sazovor joylarni yagona turistik marshrutlarga birlashtirish maqsadida Markaziy Osiyo davlatlari va Ozarbayjon uchun umumiy turistik viza joriy etish tashabbusi bilan chiqdi.
U bu haqda Turkmanboshidagi «Avaza» turistik zonasida boʻlib oʻtgan yetakchilarning maslahat uchrashuvida maʼlum qildi. Japarovning soʻzlariga koʻra, mintaqa davlatlarida turizmni birgalikda rivojlantirish uchun barcha sharoitlar mavjud: qadimiy shaharlar, togʻ landshaftlari, Kaspiy dengizi sohillari va boy madaniy meros.
«Bir nechta davlatga bir sayohat» — Qirgʻiziston rahbari hamkorlikni yoʻlga qoʻyish mumkin boʻlgan tamoyilni shunday ifodaladi. U tashqi siyosat idoralariga umumiy vizani joriy etishning aniq mexanizmlarini ishlab chiqishni topshirishni taklif qildi.
«Avaza»dagi maslahat uchrashuvida Ozarbayjon, Qozogʻiston, Qirgʻiziston, Oʻzbekiston, Tojikiston va Turkmaniston yetakchilari ishtirok etmoqda.
Sammit doirasida MDH davlatlari milliy taomlari festivali boʻlib oʻtmoqda, unda Oʻzbekiston stendi ham taqdim etilgan boʻlib, ushbu stendni kuni kecha Shavkat Mirziyoyev va Hamdoʻstlik mamlakatlari delegatsiyalari rahbarlari borib koʻrdilar.