Janubiy koreyalik tadbirkor Namanganda loyihalarni rejalashtirmoqda

Janubiy koreyalik tadbirkor Namanganda loyihalarni rejalashtirmoqda

Janubiy Koreyaning U&K Global Network, EcoFarm Global va Baeklim Development kompaniyalari direktorlar kengashi raisi Lim Sang Xva yangi investitsiya loyihalarini muhokama qilish uchun Namangan viloyatiga keldi. Bu haqda Namangan viloyati hokimligi axborot xizmati ma’lum qildi.

Tashrif davomida tadbirkor Namangan viloyati hokimi Shavkatjon Abdurazzakov bilan uchrashdi. Uchrashuvda Chust va Mingbuloq tumanlarida baliqchilik hamda qurilish yo‘nalishlarida amalga oshirilishi rejalashtirilayotgan loyihalar ko‘rib chiqildi.

Chust tumanida Lim Sang Xva baliq uchun ozuqa ishlab chiqarish, shuningdek, zamonaviy ko‘p qavatli turar joy majmualarini barpo etishga sarmoya kiritmoqchi.

Mingbuloq tumanida esa “aqlli” baliqchilik texnologiyalaridan foydalangan holda innovatsion baliqchilik xo‘jaligini tashkil etish masalasi muhokama qilinmoqda. Bundan tashqari, investor baliqni qayta ishlash loyihasini ham amalga oshirishni rejalashtirmoqda.

Lim Sang Xva 20 yildan ortiq vaqt davomida professional faoliyat bilan shug‘ullanib keladi va qishloq xo‘jaligi, ko‘chmas mulkni rivojlantirish hamda xalqaro savdo sohalarida loyihalarni amalga oshirgan. 2025 yildan buyon u Janubiy Koreya va O‘zbekiston o‘rtasidagi iqtisodiy hamkorlikni kengaytirishda ishtirok etib kelmoqda.

Uchrashuv yakunida tomonlar taklif etilgan investitsiya loyihalarini muhokama qilib, hamkorlikni davom ettirishga kelishib oldilar.